„Þeirra kröfur eru algerlega óaðgengilegar,“ segir Guðbjartur Ellert Jónsson, framkvæmdastjóri Vestmannaeyjaferjunnar Herjólfs, um kröfur Sjómannafélags Íslands í kjaradeilu aðilanna.

Á miðnætti í gærkvöldi hófst önnur vinnustöðvun af þremur sem Sjómannafélagið hafði boðað vegna kjaradeilu félagsins við rekstrarfélag Herjólfs. Hluti áhafnarinnar er í Sjómannafélaginu sem krefst þess að bætt verði við einni tólf manna áhöfn þannig að þær verði fjórar og vinnuálagið þar með minna en launin óbreytt. Guðbjartur segir þetta jafngilda um 30 prósent launahækkun.

„Það sem manni er mest brugðið yfir er það að jafn ábyrgir aðilar og stéttarfélög eru skuli á þessum tíma koma til hugar að fara fram á 30 prósent launahækkanir ofan á lífskjarasamninga sem búið er að gera,“ segir Guðbjartur. Hann kveður þernur og þjóna á Herjólfi hafa um 816 þúsund krónur í mánaðarlaun og hásetar fái yfir milljón.

„Þetta er hátekjufólk um borð í Herjólfi. Ef við lítum á þjóna og þernur þá eru sambærileg störf unnin víða í landinu og mér er það til efs að þessi laun þekkist annars staðar. Það er þá eingöngu vegna þess að þessi vinnustaður er fljótandi en ekki í steyptu húsi,“ segir Guðbjartur.

Ekki náðist í gær í Jónas Garðarsson sem fer fyrir samninganefnd Sjómannafélags Íslands.