Björn Leví Gunnars­son, þing­maður Pírata, segir aug­ljóst að Bjarni Bene­dikts­son, fjár­mála- og efna­hags­ráð­herra, ætti að stíga til hliðar á meðan spurningum er enn ó­svarað um sölu á hlut ríkisins í Ís­lands­banka.

„Mér finnst rosa­lega aug­ljóst að fjár­mála­ráð­herra á ekki að vera neins staðar þar sem hann er mögu­lega fyrir ein­hverju ferli í rann­sókninni á þessu,“ segir Björn Leví í sam­tali við Frétta­blaðið.

„Það er svo aug­ljóst að hann er að bregðast sinni skyldu, sinni á­byrgð, gagn­vart þeirri á­kvarðana­töku sem hann á að fara í,“ segir Björn Leví en þar vísar hann til þess að ráð­herra hafi ekki óskað eftir frekari upp­lýsingum þegar fjöldi til­boða í hlut ríkisins lá fyrir.

Segir þátt fjár­mála­ráð­herra ekkert skoðaðan

„Banka­sýslunni var aug­ljós­lega hent undir rútuna, það var al­gjört klúður. Það var mjög aug­ljóst frá upp­hafi og í rauninni var þáttur fjár­mála­ráð­herra bara ekkert skoðaður. Það er þarna gagn­rýni á að það hafi verið aug­ljós mis­tök við undir­búning og það er fjár­mála­ráðu­neytið og fjár­mála­ráð­herra sem er þarna í undir­búningnum og hann er þarna í á­kvarðana­tökunni um verð, magn og svo­leiðis,“ segir Björn Leví.

Hann segir á­huga­vert að sjá að fjár­mála­ráð­herra hafi fengið, að því er virðist, rangar upp­lýsingar varðandi söluna. „Það er ekki nægi­lega vel út­skýrt í skýrslunni en það virðist vera að hann hafi fengið rangar upp­lýsingar, sem er rosa­lega al­var­legt að ráð­herra fái rangar upp­lýsingar fyrir svona stóra á­kvarðana­töku en þegar upp­lýsingarnar eru á þann hátt að það eru 150-200 til­boð að ráð­herra biðji ekki um að fá ná­kvæmari upp­lýsingar.“

Björn Leví segist ekkert hafa á móti því að fram­kvæmd verði frekari rann­sókn á málinu og hvort málið varði ráð­herra á­byrgð.

„Mér finnst það aug­ljóst að klúðrið er það mikið að ég þarf ekki frekari rann­sókn til þess að segja að þetta er greini­lega eitt­hvað sem varðar ráð­herra­á­byrgð, það er mín skoðun. Pólitískt er þetta nóg fyrir mig. Hvort að síðan laga­lega séð, hvort að á­byrgðin komi inn, það er flóknara,“ segir hann.

Um­ræða um leka sé „klassísk af­vega­leiðing“

Björn Leví segist ekki hafa á­hyggjur af því að skýrslunni hafi verið lekið til fjöl­miðla um sólar­hring áður en hún átti að birtast fyrir al­menning.

„Áður birti Ríkis­endur­skoðun þessar skýrslur strax en þingið bað um auka tíma fyrir þing­menn til þess að lesa skýrsluna áður en fjöl­miðlar væru farnir að segja um niður­stöður skýrslunnar. Þá hefði þingið smá tíma áður en það væri búið að reka hljóð­nema framan í þau ó­lesin að koma með at­huga­semdir, en það var síðan ekkert vanda­mál.“

„Þetta er klassísk af­vega­leiðing, að kalla þetta brot á trúnaði en þessi trúnaður er ekki neitt. Þetta eru smá tafir á birtingu, tíma­bundinn trúnaður fyrir á­kveðið svig­rúm fyrir þing­menn sem var þegar til staðar hvort eð er,“ segir Björn.

„Ég hef engar á­hyggjur af þessu, þetta er ekki trúnaðar­brestur fyrir fimmaura,“ bætir hann við.