Í dag undirrituðu ráðherrar; háskóla-, iðnaðar- og nýsköpunarráðuneytis, mennta- og barnamálaráðuneytis, félags-og vinnumarkaðsráðuneytis auk rektors Háskóla Íslands, rektors Háskólans á Akureyri og formanns Sambands íslenskra sveitarfélaga viljayfirlýsingu um þróun og innleiðingu fagháskólanáms í leikskólakennarafræðum á landsvísu.

Í tilkynningu kemur fram að markmiðið með viljayfirlýsingunni er fjölgun leikskólakennara og að fagháskólanámi í leikskólafræðum verði komið á fót og það fest í sessi í öllum landshlutum. Jafnframt er markmiðið að árið 2025 brautskráist að lágmarki 50 úr fagháskólanámi og að meirihluti nemenda haldi áfram í B.Ed. námi í leikskólafræðum.

Fram kemur í tilkynningunni að með breiðri samstöðu sé von um að hægt verði að bjóða upp á fagháskólanám í hagnýtri leikskólafræði fyrir alla landshluta í góðu samstarfi Háskóla Íslands og Háskólans á Akureyri.

Þá er stefnt að því að endurnýja samning við Keili hvað varðar skipulag og framkvæmd námsins á suðvesturhorni landsins og jafnframt verður leitað samstarfs við sveitarfélög og símenntunarmiðstöðvar landsins. Unnið verður að því að haustið 2023 verði hægt að hefja námið í flestum landshlutum og fer það meðal annars eftir því hversu vel undirbúningur og fjármögnun gengur.

Samkvæmt tilkynningu er um að ræða hagnýtt 60 ECTS diplómanám. Námið er ætlað fólki með mikla starfsreynslu úr leikskóla sem ekki hefur lokið stúdentsprófi en hefur vilja og löngun til að bæta við sig þekkingu og hæfni í leikskólastarfi. Þegar diplómanáminu er lokið geta nemendur sótt um og fengið námið metið að fullu sem fyrsta ár af þremur í B.Ed. námi.

Tveir nemendahópar hafa þegar farið í gegnum námið, annars vegar af Suðurlandi og hins vegar af Suðurnesjum.

Aðilar viljayfirlýsingar:

Áslaug Arna Sigurbjörnsdóttir, ráðherra háskóla-, iðnaðar- og nýsköpunarráðuneyti

Ásmundur Einar Daðason, ráðherra fennta- og barnamálaráðuneyti

Guðmundur Ingi Guðbrandsson, ráðherra félags-og vinnumarkaðsráðuneyti

Jón Atli Benediktsson, rektor Háskóla Íslands

Eyjólfur Guðmundsson, rektor Háskólans á Akureyri

Heiða Björg Hilmisdóttir, formaður Samband íslenskra sveitarfélaga