Garðabær vill fá að heyra frá foreldrum eða börnum sem voru á leikskóla eða í daggæslu hjá Hjalteyrarhjónunum Einari og Beverly Gíslason í Garðabæ. Fram kemur í tilkynningu frá sveitarfélaginu að úttekt á störfum þeirra sé hafin.

Garðabær lítur málið afar alvarlegum augum og hefur fengið utanaðkomandi aðila, EAÞ ráðgjöf, til að gera úttekt á starfsemi hjónanna í bænum. Í samráði við úttektaraðila er vinna þegar hafin hjá Garðabæ við að afla nánari upplýsinga um störf þeirra sem dagforeldra og um leikskólareksturinn sem fram fór í Garðabæ, svo sem gögn um verklag, lög og reglur, gögn um börn og starfsmenn.

Fram kemur að á þessum tímapunkti sé erfitt að gefa nákvæma tímalínu á vinnu við úttektina það mun ráðast af umfangi þeirra gagna sem til eru og upplýsinga sem berast til sveitarfélagsins og ráðgjafa. Farið verði gaumgæfilega yfir hvernig verklagið var, hvort farið var eftir því, hvort vinnulag sé með öðrum hætti í dag og lærdómur dreginn af því um hvernig má gera betur.

Garðabæ beinir því til foreldra eða barna sem voru á leikskóla eða í daggæslu hjá Hjalteyrarhjónunum að hringja í þjónustuver Garðabæjar vegna málsins í s. 525 8500 eða senda tölvupóst á netfangið gardabaer@gardabaer.is með fyrirspurnum, ábendingum eða óskum um samtal og/eða ráðgjöf. Einnig er hægt að hafa beint samband við Anný Rós Ævarsdóttur félagsráðgjafa á fjölskyldusviði Garðabæjar í netfangi annyaev@gardabaer.is Haft verður samband eins fljótt og auðið er við alla þá sem hringja eða senda tölvupóst.