Jón Hjalta­son, sagn­fræðingur sem skipaði þriðja sæti á lista Flokk fólksins í vor ætlar ekki að tala við flokks­fé­laga sína sem hafa á­sakað hann og aðra karl­menn innan flokksins fyrr en á­sakanirnar gegn þeim hafa verið dregnar til baka og þeir beðnir af­sökunar.

Mikið hefur gengið á innan flokksins eftir að þrjár konur sem skipuðu efstu sæti á lista Flokks fólksins á Akur­eyri í vor á­sökuðu for­ystu­menn flokksins um of­beldi, kyn­ferðis­lega á­reitni og ein­elti í að­draganda kosninganna í vor og eftir þær.

Á­sakanirnar beinast að öllum líkindum að þeim Brynjólfi Ingvars­syni, odd­vita flokksins og Jóni Hjalta­son.

Inga Sæ­land, for­maður Flokk fólksins boðaði heim­sókn norður á Akur­eyri núna um helgina, en ekkert varð úr þeirri ferð, að sögn Jóns.

„Núna boðar hún komu sína norður og kemur svo ekki en býður okkur aftur, eða boðar okkur, með ör­skömmum fyrir­vara að koma til fundar við hana og þau í Reykja­vík núna á eftir. Því boði hef ég hafnað,“ sagði Jón í sam­tali við RÚV.

Hann vill að á­sakanirnar séu dregnar til baka og ætlar sér ekki að hafa nein sam­skipti við flokks­fé­laga sína þangað til af­sökunar­beiðni hefur borist honum. Hann segir það sam­eigin­lega kröfu þeirra karla sem skipuðu lista flokksins í vor.

Mynd/Flokkur fólksins