Vilborg Arna Gissurardóttir, pólfari, opnar sig um ofbeldi sem hún varð fyrir af hendi þekkts fjallaleiðsögumanns í opinni færslu sem hún birti á Facebook-síðu sinni.
„Heimilisofbeldi og hvers kyns ofbeldi í öllum sínum birtingarmyndum er þungt farg að bera fyrir þolendur slíkra mála, fjölskyldur og alla þá sem tengjast á einn eða annan hátt. Eins og margir vita nú þegar tengist ofbeldismál sem er nú til umfjöllunar í fjölmiðlum mér og er ég ein af þeim konum sem um ræðir,“ skrifar hún.
Þá segist Vilborg styðja frásögn konu sem sagði frá upplifun sinni af heimilisofbeldi sem hún lenti í frá sama manni á Facebook-hópnum Fjallastelpur í gær og segist jafnframt hafa staðið í sömu sporum og hún. Í kjölfar ásakananna hefur hvert fyrirtækið af fætur öðru slitið samstarfi við manninn sem um ræðir.
„Svona lífsreynsla markar mann fyrir lífstíð og skilur eftir ör á sálinni. Með aðstoð góðs fólks og tímanum grynnka örin þó þau hverfi kannski aldrei alveg. Minn bakpoki er ansi þungur eftir lífsreynslu síðustu ára og hefur markað mig á ýmsan hátt þó ég beri það ekki utan á mér. Eins hefur þetta haft afleiðingar sem hefur tekið tíma að vinna úr og sú vinna heldur auðvitað áfram,“ skrifar Vilborg.
Vilborg segist hafa staðið í sömu sporum og konan sem greindi fyrst frá málinu bæði meðan á sambandi hennar og mannsins stóð og á samstarfsvettvangi. Þá segir hún þolendur og gerendur ekki vera steyptir í eitt fast mót.
„Það erum við sem samfélag að læra betur og betur. Það skiptir máli að standa saman og umvefja þolendur ásamt því að úrlausnir séu til staðar fyrir gerendur. Fyrir mig persónulega hefur sú vakning sem hefur átt sér stað að undanförnu skipt miklu máli og það er mikilvægt að við höldum áfram á þeirri braut. Ég mun leggja mitt á vogarskálarnar þegar kemur að þeirri umræðu,“ skrifar Vilborg.
