Þórunn Egilsdóttir, þingmaður Framsóknarflokksins, hefur greinst með brjóstakrabbamein og víkur af þingi til að takast á við veikindin. Hún greinir frá þessu á Facebook. „Það er þess eðlis að ég þarf að fara í harða meðferð gegn því,“ skrifar Þórunn. 

Hún segist á Facebook hafa fengið stórt verkefni til að takast á við í lífinu. Hún hafi ekki óskað eftir því, frekar en nokkur annar sem fær „þetta tilboð í lífinu“. Þórunn segist þó ætla að einhenda sér í verkið af öllum þunga. „Ég hef aldrei farið baráttu til að tapa og hyggst ekki byrja á því núna. Bjartsýn, einbeitt, ákveðin og umvafin mínu fólki ætla ég að takast á við verkefnið.“

Þórunn er fjórði varaforseti þingsins og formaður þingflokks Framsóknarflokksins. Hún hefur verið á þingi frá árinu 2013.

Willum Þór Þórsson verður formaður þingflokks Framsóknarflokksins.