Þeir sem tóku þátt í björgunaraðgerðum í Skötufirði í gær þar sem bíll fór í sjóinn eru nú lausir úr úrvinnslusóttkví. Sýni þeirra sem lentu í slysinu og komu til landsins frá útlöndum í gær reyndist neikvæð.
Eins og greint var frá í gæt þurfti nokkur hluti viðbragðsaðila sem tóku þátt í aðgerðunum í gær að fara í úrvinnslusóttkví í kjölfar þeirra. Það var vegna þess að fjölskyldan sem lenti í bílslysinu var nýkomin til landsins og var í nokkurra daga sóttkví á milli fyrstu og annarrar sýnatöku á landamærunum.
Niðurstaða sýnanna varð ljós nú eftir hádegi í dag og reyndust þau neikvæð. Viðbragðsaðilarnir eru því lausir úr sóttkví.
Eins og greint var frá í dag lést kona sem lenti í slysinu á gjörgæsludeild seint í gærkvöldi. Hinir sem voru í bílnum voru ungt barn hennar og faðir þess. Þau eru enn í læknishöndum á spítala og ekki hægt að greina frá líðan þeirra að svo stöddu.
Rannsókn á tildrögum slyssins stendur enn yfir.
„Sóknarpresturinn í Önundarfirði hefur opnað Flateyrarkirkju og býður þeim sem það vilja að koma þangað og eiga stund milli kl. 14:00 og 16:00. Gætt verður að sjálfsögðu að sóttvarnareglum," segir þá í tilkynningu frá lögreglunni á Vestfjörðum.
Viðbragðsaðilar lausir úr úrvinnslusóttkví. Viðbragðsaðilar sem tóku þátt í lífsbjargandi aðgerðum þegar umferðarslysið...
Posted by Lögreglan á Vestfjörðum on Sunday, 17 January 2021
