Bjarni Benediktsson sat aukafund utanríkisráðherra ríkja Atlantshafsbandalagsins í fjarveru Þórdísar Kolbrúnar Reykfjörð Gylfadóttur í gær þar sem öryggismál í Evrópu og hernaðaruppbygging Rússlands í og við Úkraínu voru rædd.

Fundað verður á ný í NATO-Rússlandsráðinu á morgun til að halda áfram uppbyggilegu samtali um stöðugleika í Evrópu.

Undanfarnar vikur hefur spennan aukist í alþjóðlegum samskiptum í tengslum við aðgerðir Rússlands við landamæri Úkraínu af ótta við að það komi til hernaðarátaka á landamærunum.

Á fundinum í gær var lögð áhersla á að frekari brot Rússa á reglum um öryggismál gætu leitt til alvarlegra afleiðinga fyrir Rússa, á sama degi og viðræður hófust á milli fulltrúa Bandaríkjanna og Rússlands í von um að finna friðsæla lausn við landamæri Úkraínu.