Í dag er spáð norðaustan og norðan 8 til 15 metrum á sekúndu og snjókomu eða slyddu víðsvegar um landinu. Með kvöldinu á síðan að stytta upp og hiti á bilinu 0 til 7 stig.

Þá segir í hugleiðingum veðurfræðings Veðurstofu Íslands, „ Kalt loft streymir yfir landið og nú í morgunsárið er víða ansi vetrarlegt um að litast. Í dag verða norðaustan og norðan 8-15 m/s og allvíða snjókoma eða slydda, en hægari vindur sunnanlands fram eftir degi og skúrir eða él. Á vegum norðan- og austanlands má því víða búast við vetraraðstæðum, einkum á fjallvegum. Hiti 0 til 7 stig, mildast sunnantil. Það dregur úr ofankomu í kvöld.

Hægari norðlæg átt á morgun, en strekkingur austast á landinu fram eftir degi. Dálítil él á norðanverðu landinu með hita nálægt frostmarki, en sunnan heiða verður bjart að mestu og hiti 3 til 8 stig yfir daginn, en þar eru þó líkur á einhverjum síðdegisskúrum. "

Veðurhorfur á landinu næstu daga

Á föstudag:
Norðlæg átt 5-10 m/s, en 10-15 austast á landinu fram eftir degi. Dálítil él á norðanverðu landinu og hiti nálægt frostmarki. Bjart að mestu sunnan heiða með hita 3 til 9 stig yfir daginn, en líkur á stöku síðdegisskúrum.

Á laugardag:
Suðaustan og austan 5-13 og rigning með köflum, en lengst af úrkomulítið á Norður- og Austurlandi. Hlýnandi, hiti 2 til 8 stig eftir hádegi.

Á sunnudag:
Suðlæg átt 3-10 og súld eða dálítil rigning með köflum, en léttir til um landið norðaustanvert. Hiti 4 til 12 stig.

Á mánudag og þriðjudag:
Austlæg átt, skýjað með köflum og lengst af þurrt. Milt í veðri, einkum vestanlands.

Á miðvikudag:
Útlit fyrir austlæga átt með vætu á köflum.

Vegagerðin varar við hálkublettum

Á vef vegargerðarinnar segir að búast megi við umferðartöfum við gatnamót Miklubrautar og Skeiðarvogs vegna vinnu við umferðarljós og er vegfarendum bent á að slökkt verður á ljósunum.

Þá eru hálkublettir víða á landinu og vegfarendur beðnir að aka með gát og fylgjast með vef Vegagerðarinnar fyrir frekari upplýsingar og í síma 1777.