Ás­mundur Sveins­son, annar eig­andi hand­verks­barsins Session Craft bar, segir að fjár­hags­lega höggið af að­gerðum stjórn­valda í dag vera gríðar­lega mikið.

„Þetta er svo marg­þætt. Fólk rekur ekki fyrir­tæki frá degi til dags, viku til viku og frá mánuði til mánaðar heldur lengra fram í tímann,“ segir Ásmundur í samtali við Fréttablaðið.

„Við erum með okkar sér­fræði­kunn­áttu og það sem við leggjum á­herslu og það er í raun fersk vara. Við erum ný­búnir að panta inn vöru fram í tímann og það er rétt rúm­lega mánuður síðan við fengum að opna aftur og nú þurfum við að fara loka,“ segir Ás­mundur.

„Við erum að fara hella fullt af bjór því hann endist ekki,“ bætir hann við. Ás­mundur segist hafa skilning á því að stundum þurfi að grípa til harðra að­gerða en bendir á að reksturinn hjá sér hefur verið lokaður í sex til sjö mánuði af síðustu tólf.

Hefur áhrif á alla fjölskylduna

Ásmundur segir að reksturinn hafi verið komið í slæmt ásigkomulag eftir síðustu lokun og gæti þetta því ekki komið á verri tíma.

„Okkur leist nú ekki á blikinu og vorum eigin­lega að verða súr­efnis­lausir þegar það mátti opna aftur. Þannig það kom á besta tíma en hvað þessi lokun mun standa veit maður ekki. Þetta er bara erfitt,“ segir Ás­mundur.

Session fjár­festi ný­lega í sjálfs­af­greiðslu­kerfi til að reyna halda rekstrinum gangandi til að geta fylgt öllum reglum. „Það er búið að taka svo mikið tönnina úr okkar rekstri í heilt ár. Við höfum reynt okkar besta og gert okkar besta í að fylgja öllu en samt erum við hér, aftur,“ segir Ás­mundur.

„En þetta er ekki bara peningar heldur hellings tími. Ég er þriggja barna faðir og þetta hefur ekki bara á­hrif á mann sjálfan heldur alla fjöl­skylduna, börnin manns og alla í kringum mann,“ segir Ásmundur.

„Við erum líka búnir að vinna undir tak­mörkunum sem hefur haft mikil á­hrif á okkar rekstur. Við höfum verið dug­legir að fylgja öllum þeim tak­mörkunum sem okkur hefur verið sett og fylgt öllum reglum en við erum alltaf að taka höggið,“ segir Ás­mundur og bætir við að hann sé mjög ósáttur við stjórnvöld hvað varðar stöðuna á bólusetningum á Íslandi.