Hildur Sverris­dóttir, frambjóðandi Sjálf­stæðis­flokksins í Reykjavík og að­stoðar­maður ferða­mála- iðnaðar- og ný­sköpunar­ráð­herra, fagnar þeirri mikilvægu umræðu sem á sér nú stað í tengslum við MeToo byltinguna en segir það varhugavert að fólk í samfélaginu taki að sér refsivald þegar dómstólar bregðast.

„Samfélagsmiðlar eru frábær vettvangur fyrir byltingar en hrikalegur dómstóll. Þetta finnst mér verða að hafa í huga þótt tilfinningarnar gagnvart kerfi sem þykir ekki virka á sanngjarnan hátt séu meira en skiljanlegar. Byltingunni fylgja ótal raddir og skoðanir um hvernig eigi að bregðast við. Við höfum þegar séð atlögur gerðar að því að framfylgja réttlætinu svo að segja í beinni og það vekur mér raunverulegum ugg að það verði að viðteknum hlut að fólk í samfélaginu taki refsivaldið í sínar hendur þegar kerfið bregst,“ skrifar Hildur í pistli á Facebook.

Hildur hefur mikla reynslu af störfum gegn kynferðisbrotum og takmörkunum á sjálfsákvörðunarrétti kvenna. Þá er hun einnig sjálf þolandi. Hún sé hins vegar enn að læra og segir það hollt að hugsa hlutina upp á nýtt.

„Heilt yfir fagna ég þeirri mikilvægu umræðu sem er að eiga sér stað. Það hefur verið þungbært að lesa yfir allan þann aragrúa frásagna þar sem fólk lýsir upplifun sinni af ofbeldi. Það er þungbært að átta sig á að það séu enn alvarlegar brotalamir í samskiptum fólks og í kerfinu sem á að styðja við það,“ skrifar Hildur.

„Lögin eru ekki óvinur fólksins í landinu“

Hún segir að síðustu ár hafi verið ein langvarandi bylting, margt hefur unnist til betri vegar og við erum enn að.

„Kerfið nú þarf að geta brugðist við flóknara og grárra svæði en hingað til hefur verið einblínt á og þá sérstaklega með það fyrir augum að þolendur og gerendur fái betri leiðsögn, stuðning og lausnir. Lögin eru mannanna verk og geta aðlagast og breyst með breyttum samfélagsviðmiðum,“ skrifar Hildur og bætir við að lögfræðingurinn í sér á samt alltaf erfitt með að kryfja slík mál algjörlega óháð lagalegu hliðinni.

„Lögin eru ekki óvinur fólksins í landinu heldur þvert á móti eru þau í grunninn samfélagssáttmáli fólksins. Lögin verða aldrei fullkomin en sanngjarnt réttarkerfi er ein mikilvægasta trygging mannréttinda sem fram hefur komið í sögu mannkyns. Við getum bæði litið aftur í söguna og til landa í heiminum í dag þar sem réttarkerfið er virt að vettugi og lög túlkuð eftir hentugleik sem býður upp á ógeðfellt ofríki ríkja gagnvart fólkinu sínu.“

Megum ekki kollvarpa grunnréttindum borgaranna

Hildur segir einnig að ef við ætlum að breyta samfélaginu verður það að vera með þeim hætti að við kollvörpum ekki kerfum sem þjóna þeim tilgangi að að vernda grunnréttindi borgaranna. „Við bætum ekki eitt óréttlæti með því að búa til annað óréttlæti,“ skrifar Hildur.

Hún segir mikilvægt að taka okkur tíma til að ræða hvernig við viljum leysa vandann og hvaða áhrif lausnirnar geta haft á allt samfélagið.

„Þess vegna hlýtur nú að taka við heiðarlegt samtal um það hvernig við getum breytt menningunni sem býr til ofbeldið, búið til samfélag sem hlustar og trúir og býður leiðir sem koma að raunverulegu gagni fyrir þolendur og gerendur - en að við gætum þess að á eftir sitjum við ekki uppi með ríki þar sem fólk getur ekki treyst því að réttarkerfið verndi grunnréttindi þeirra,“ skrifar Hildur að lokum.