„Við erum auðvitað öll hingað kosin til að standa við okkar sannfæringu og hvert og eitt okkar ber ábyrgð á sinni eigin hegðan. Við hljótum að gera þær kröfur, um leið og við setjum okkur siðareglur, að hvert og eitt okkar fari yfir þær og taki það til sín að bera ábyrgð á eigin hegðan – hvort sem við erum stödd í opinberum erindagjörðum eða í almenna rýminu, því við erum alltaf kjörnir fulltrúar, sama hvar við erum.“ 

Þetta sagði Katrín Jakobsdóttir forsætisráðherra í óundirbúnum fyrirspurnatíma á Alþingi í dag, en líkt og búast mátti við snúa flestar fyrirspurnir að títtnefndum Klaustursupptökum og þeirri óvarlegu umræðu sem þar fór fram milli sex þingmanna. 

„Sú orðræða sem hefur verið gerð að umtalsefni á undanförnum dögum var dapurleg, einkenndist af kvenfyrirlitningu, fordómum gagnvart ýmsum hópum, hvort sem er gegn hinsegin fólki, fötluðu fólki eða öðrum hópum, og slík orðræða er í senn óverjandi og óafsakanleg,“ sagði hún. 

Katrín sagðist fagna því að forsætisnefnd ætli að bregðast við málinu, en Steingrímur J. Sigfússon, forseti Alþingis, upplýsti við upphaf þingfundar að það yrði rannsakað sem mögulegt siðabrot. 

„Ég vil segja það að mér hefur fundist samstaða rík um það hér á þingi að það sé mikilvægt að bregðast hart við þegar svona mál koma upp,“ sagði hún og undirstrikaði mikilvægi þess að kjörnir fulltrúar taki höndum saman til þess að reyna að byggja upp traust almennings á stjórnmálum.

„Það er stórkostleg áskorun fyrir okkur öll, og við höfum oft rætt það hér í þessum sal, hvernig við getum byggt upp traust á stjórnmál á Alþingi og þetta atvik er ekki síst dapurlegt því við vorum farin að sjá það traust þokast upp á við í þeim mælingum sem gerðar eru með reglubundnum hætti.“