Jafnrétti

Karlar ekki einir um að beita ofbeldi

„Þegar konur taka þátt í þöggun á ofbeldi gegn kynsystur sinni eða þegar þær leggja þær í einelti á vinnustað, það skil ég ekki,“ segir Hulda Ragnheiður Árnadóttir framkvæmdastjóri sem situr í aðgerðahóp velferðarráðuneytis gegn einelti, áreitni og ofbeldi á vinnustöðum landsins.

Hulda Ragnheiður Árnadóttir hjá FKA segir alla þurfa fræðslu um ofbeldi, bæði konur og karla. Konur eigi að vera konum bestar. Fréttablaðið/Eyþór

Sumir spyrja sig nú þegar þeir velta fyrir sér atburðarásinni í Orkuveitunni: Skilaði #MeToo-byltingin engu? Ég svara því til að byltingin sé rétt að byrja,“ segir Hulda Ragnheiður Árnadóttir, framkvæmdastjóri Náttúruhamfaratrygginga Íslands.

Stjórn Félags kvenna í atvinnulífinu (FKA) fundaði í vikunni um uppsögn Áslaugar Thelmu Einarsdóttur, fráfarandi forstöðumanns einstaklingsmarkaðar hjá Orku náttúrunnar (ON). Í tilkynningu frá FKA lýsti stjórn félagsins vanþóknun á því hvernig staðið hefur verið að málinu innan móðurfyrirtækis ON, Orkuveitu Reykjavíkur. Í yfirlýsingu stjórnar sagði: „Það er algjörlega óviðunandi eftir alla þá umræðu sem orðið hefur í kjölfar #MeToo byltingarinnar að ekki sé staðið faglega að málum vegna kynbundins ofbeldis og áreitni.“

Hulda er fulltrúi Félags kvenna í atvinnulífinu í starfshópi á vegum velferðarráðuneytis sem fylgir eftir aðgerðum á vinnumarkaði gegn einelti og kynferðislegu og kynbundinni áreitni og ofbeldi á vinnustöðum. „Nefndin hefur fengið það verkefni að koma með hugmyndir að úrbótum á vinnuumhverfi. Við vinnum einnig úr hugmyndum um fræðslu til fyrirtækja. Til að mynda heimasíðu þar sem verða upplýsingar um málefnið. Skýrar leiðbeiningar til stjórnenda um aðgerðir og viðbrögð gegn einelti og kynbundinni áreitni og kynferðislegu ofbeldi á vinnustöðum,“ segir hún og segir flesta meðlimi aðgerðahópsins þekkjast vel og hafa starfað áður að úrbótum í málaflokknum á öðrum vettvangi.

Hulda hefur vegna vinnu sinnar í aðgerðahópnum fengið í trúnaði fjölmörg dæmi um áreitni, ofbeldi og einelti. Henni þykir verst þegar konur eru gerendur gegn konum. „Þá verð ég hrygg. Ég hef ekki umburðarlyndi fyrir því þegar karlar telja sig mikilvægari konum, en ég hef á því vissan skilning. Þegar konur taka þátt í þöggun á ofbeldi gegn kynsystur sinni eða þegar þær leggja þær í einelti á vinnustað, það skil ég ekki. Við verðum að vera óhræddar við að tala um þetta og átta okkur á því að allir þurfa fræðslu um ofbeldi, bæði konur og karlar. Karlar eru alls ekki einir um að beita ofbeldi,“ segir hún og bendir á að FKA sé vettvangur kvenna til að stækka tengslanetið og efla sig sem stjórnendur. „Konur eiga að vera konum bestar, það er það sem við göngum út frá í FKA og viljum vinna að. Konur eru líka rétt að byrja að átta sig á því að þær gegni mikilvægu hlutverki í að gagnrýna þessa menningu, hafa hátt um hana. Þær eigi ekki að taka þátt í úr sér genginni og skaðlegri menningu,“ segir Hulda.

Hún bendir á að OR-málið sé það fyrsta þar sem háttsettur stjórnandi sé látinn taka afleiðingum gjörða sinna. „Við verðum að muna að þetta mál er aðeins ein birtingarmynd vandans. Við eigum að læra af því. Það eru fjölmargar aðrar konur og karlar sem glíma við afleiðingar áreitni, eineltis og ofbeldis.

Ég veit um konur sem hafa bakkað út úr góðu starfi vegna áreitni eða eineltis. Ég veit um eitt svæsið dæmi í stjórnmálum þar sem kona þurfti að velja um frama innan flokksins eða afhjúpa háttsettan aðila innan hennar flokks sem áreitti hana á mjög óviðeigandi hátt. Hennar hagsmunir voru of miklir innan flokksins til að hún væri tilbúin til að segja sannleikann um hegðun mannsins. Þá veit ég um konur sem hafa stigið til hliðar vegna eineltis annarra kvenna. Þær segja gjarnan aðspurðar: Ég vildi breyta til. Kjósa að fara í stað þess að reyna að takast á við vandann. Ég held að það skorti betri leiðir til þess að taka á ofbeldi, einelti og áreitni á vinnustað. Það er bara nýlega sem ég komst að því að það er lögbundið hlutverk Vinnueftirlitsins að taka á þessum málum en stofnunin hefur litla burði til þess.“ í dag,“ segir Hulda.

Athugasemdir

Auglýsing
Auglýsing

Tengdar fréttir

Jafnrétti

Jafnlaunavottun fyrirtækja líklega frestað

Jafnrétti

Næstu skref verði tekin

Innlent

Hvasst og vætusamt víðast hvar

Auglýsing

Nýjast

Lítið eftirlit haft með öflugustu byssum landsins

Geitin komin á sinn stað

Lukku-Láki og vinir ekki undanskildir

Ekkert okur hjá H&M

Borgarbúar kjósa um rafrænt eftirlit og ýmsar umbætur í hverfum

Fyrstu kaup aldrei erfiðari

Auglýsing