Rauða kross versluninni við Hlemm verður breytt tíma­bundið í fata­út­hlutunar­stöð fyrir um­sækj­endur um al­þjóð­lega vernd og flótta­fólk. Frá þessu er greint í til­kynningu frá Rauða krossi Ís­lands en þar kemur fram að það sé gert til að geta þjónu­stað fólk betur með þarfir hvers og eins í huga. Fyrst um sinn verður opið frá klukkan 12 og til 16.

Versluninni við Hlemm verður lokað sem hefð­bundinni verslun á meðan, en opnunar­tími allra annarra verslana Rauða krossins breytist ekki.Fram kemur í til­kynningunni að allir um­sækj­endur um al­þjóð­lega vernd og flótta­fólk séu vel­komin og að á­fram verði tekið á móti hefð­bundnum fata­kortum í verslun Rauða krossins í Mjódd.

Fata­söfnun Rauða krossins fer fram um allt land og hægt er að gefa föt til flótta­fólks í fata­gáma Rauða krossins. Sér­stak­lega er óskað eftir hlýjum vetrar­fatnaði fyrir flótta­fólk, eins og úlpum og vetrar­skóm og hvers­dags­fatnaði, sokka og nær­fatnaði. Hægt er að senda tölvu­póst á fata­flokkun@redcross.is ef um stærri gjafir er að ræða.

Hér á vef Rauða krossins er hægt að finna frekari upp­lýsingar um fata­söfnunar­verk­efni þeirra.

Í síðustu viku sendi Rauði krossinn 70 milljónir, sem safnast höfðu í neyðar­söfnun fé­lagsins og með stuðningi utan­ríkis­ráðu­neytisins, til mann­úðar­að­gerða Al­þjóða Rauða krossins í og við Úkraínu. Neyðar­söfnun fé­lagsins heldur á­fram en frá og með deginum í dag nær söfnunin einnig yfir hjálpar­starf Rauða krossins vegna þeirra sem flýja á­tökin í Úkraínu til Ís­lands.

Hægt er að styðja við neyðar­söfnun Rauða krossins með eftir­töldum leiðum:

  • SMS: Senda HJALP í síma­númerið 1900 (2.900 kr.)
  • Aur: @raudi­krossinn eða 1235704000
  • Kass: raudi­krossinn eða 7783609
  • Söfnunar­reikningur Rauða krossins: 0342-26-12, kt. 530269-2649