Vél Icelandair á leið til Parísar lenti í Glasgow

Vél Icelandair sem fór í loftið rétt eftir klukkan átta í morgun á leið til Parísar CDG lenti á flugvellinum í Glasgow fyrr í morgun.

Vélin lenti heilu og höldnu í Glasgow en var það gert vegna veikinda hjá farþega vélarinnar að sögn Guðna Sigurðssonar, upplýsingafulltrúa hjá Icelandir.

Guðni segir ákvörðun um lendinguna í Glasgow hafa verið tekna í samráði við lækna.

Að sögn Guðna fór vélin aftur á loft nú rétt fyrir klukkan ellefu en ekki var hægt að veita upplýsingar um það hvort veiki farþeginn hafi haldið förinni áfram með vélinni.