Lögregla var send að heimili í gær vegna aðila sem átti að vera í einangrun sökum COVID-19. Að sögn lögreglu var hann nokkuð ölvaður, átti erfitt með að virða mörk einangrunar og voru aðrir íbúar orðnir úrræðalausir. Aðilinn var vistaður í fangageymslu þar til víman rennur af honum.

Þá barst tilkynning um að tveir hafi gert sig heimakæra í íbúð í miðborginni án leyfis. Maður sem hafði íbúðina til umráða óskaði eftir aðstoð lögreglu vegna málsins og verða aðilarnir ákærðir fyrir húsbrot.

Sambærilegt mál kom inn á borð til lögreglu skömmu síðar þegar tveir voru búnir að koma sér fyrir í bát við Reykjavíkurhöfn. Verða þeir einnig kærðir fyrir húsbrot.

Í gærkvöldi barst lögreglunni tilkynning um mann með hnífa á heimili sínu en fram kom í tilkynningunni að maðurinn væri í annarlegu ástandi. Þegar lögregla kom á vettvang kom í ljós að maðurinn átti við andleg veikindi að stríða og var ástand hans sökum þess. Lögreglan aðstoðaði manninn við að fá viðeigandi aðstoð, er segir í tilkynningu.

Grunaður um líkamsárás

Þá var einn aðili handtekinn grunaður um líkamsárás í efri byggðum Reykjavíkur og annar grunaður um fíkniefnamisferli. Báðir voru vistaður í fangageymslu..

Einn aðili var handtekinn í miðborginni sökum annarlegs ástands og er hann einnig grunaður um rúðubrot. Sá var vistaður í fangageymslu þar til víman rennur af honum.

Lögreglu og sjúkraliði barst tilkynning um reiðhjólaslys í Hafnarfirði í gærkvöldi. Þar datt maður harkalega á reiðhjóli og þurfti að flytja aðilann á slysadeild til aðhlynningar.

Einnig bárust lögreglunni á höfuðborgarsvæðinu fjölmargar hávaðakvartanir og nokkrar kvartanir sökum flugeldasprenginga.