Það er við hæfi að hitta vinina Svala og Svavar í Kvosinni.

„Jómfrúin er eina frúin sem ég fer á,“ segir Svavar og Svali skellir upp úr.

Vinskapur þessara ólíku manna hófst hér í næsta húsi.

„Ég og Jón Gunnar Geirdal vorum að skipuleggja gamlárspartí ’97/98 á Skuggabarnum. Og þarna var landsliðinu í bænum boðið – Skjás eins klíkunni, og þessu fólki,“ segir Svali og minnist dýrðarljóma liðinnar tíðar. „Einhver stakk upp á Svavari …“ bætir hann við.

„Og svo voru sko ég og Emilíana Torrini veislustjórar!“ segir Svavar.

Vinskapurinn hófst fyrir 23 árum síðan en í dag líta þeir á sig sem fjölskyldu. Mynd/Aðsend

Tuttugu og þriggja ára vinskapur

Vinskapurinn þróaðist í gegnum skipulagið á þessu partíi.

„Og já, eftir nokkra hittinga þá fannst mér ég þurfa að segja Svavari að því miður væri ég ekki samkynhneigður, svo við yrðum aldrei meira en bara vinir,“ segir Svali.

Tuttugu og þremur árum, nokkrum hundum og fimm börnum síðar er vináttan sterk sem aldrei fyrr.

„Ég var að vinna á Jóa og félögum, og þar var að vinna með mér Jóhanna (Katrín Guðnadóttir) sem síðar varð konan hans Svala – og Daníel (Örn Hinriksson) sem er maðurinn minn í dag, þannig að við unnum þar þrjú saman,“ og Svali skýtur inn í:

„Sjúklega vinnutengt!“

„Og já, eftir nokkra hittinga þá fannst mér ég þurfa að segja Svavari að því miður væri ég ekki samkynhneigður, svo við yrðum aldrei meira en bara vinir.“

Svali

Þegar Svali giftist Jóhönnu voru aðeins tveir gestir viðstaddir, það voru Svavar Örn og Daníel.

„Svali var klukkan eitt á brúðkaupsdaginn í Kringlunni að kaupa sér föt. En við Daníel græjuðum allt; snitturnar, kókostoppana og brúðarvöndinn … alveg tvær Muriel. Þetta hefði verið nokkuð sorglegt ef við hefðum ekki verið með,“ segir Svavar og hlær.


Svaramenn og guðfeður


Svali segist bara hafa ætlað að hafa þetta mjög auðvelt:

„Ég ætlaði bara að bruna og hitta prestinn… Jóhanna fann kjólinn kvöldið áður, hann var lagaður um morguninn og ég keypti mér skyrtu og bindi.“

„Einmitt,“ segir Svavar og hlær.

„Þú stillir ekki klukkuna eftir þessu fólki, þau eru ekkert mikið að koma á undan áætlun, þessi hjón. Og ekki hjálpaði að þegar við lögðum af stað – þá var verið að þrífa göngin, og göngin lokuð,“ heldur hann áfram en brúðkaupið fór fram á Búðum á Snæfellsnesi. „Þau voru heppin að presturinn var ekki farinn bara.“

Þegar Svali og Jóhanna giftu sig var aðeins Svavari og Daníel boðið en þeir voru bæði vottar og græjuðu allt að sögn Svavars. Mynd/Aðsend

„Svavar hefur gengið með mér í gegnum flestar barneignirnar,“ segir fimm barna faðirinn Svali.

„Þeir hafa báðir verið stór hluti af lífi barnanna og eru guðfeður þess yngsta,“

Svavar segir vináttuna hafa þróast. „Við erum vinahjón og eiginlega er þetta orðið meiri fjölskylda.“

Í desember 2017 flutti Svali út til Tenerife og hefur boðið upp á rómaðar styttri ferðir fyrir ýmsa hópa, aðallega Íslendinga. Hvaða áhrif höfðu flutningarnir á vináttuna?

„Sko, Svavar talar allan daginn í vinnunni, og honum leiðist geðveikt að vera einn,“ segir Svali og Svavar bætir við:

„Við tölum saman á hverjum degi. Á leiðinni heim úr vinnunni hringi ég fyrst í Svala, svo Evu Laufey, svo mömmu og svo er ég kominn heim.“ En Svavar hringir ekki bara í hann úr bílnum. „Já, já, svo hringir hann líka í mig þegar hann er á klósettinu!“ bætir Svali við. Þetta er sem sagt alvöru vinátta.

Á leiðinni heim úr vinnunni hringi ég fyrst í Svala, svo Evu Laufey, svo mömmu og svo er ég kominn heim.“

Ævintýrin á Tenerife


Næsta ævintýri vinanna er að stofna ferðaskrifstofu. Svali hefur um árabil rekið ferðaþjónustu sem þjónustar fólk þegar það er komið til Tenerife.

„Munurinn á því sem við erum að gera saman og því sem ég er byrjaður á úti á Tenerife er að þessi ferðaskrifstofa býður upp á að bóka allan pakkann – flug, gistingu og ferðir. Fram að þessu mátti ég gera allt úti á Tenerife en ég mátti ekki koma fólkinu þangað. Svo förum við að ræða þetta, og þá segir Svavar:

„Djöfull væri ég til í að vera með þér í þessu,“ og svo fer þetta að þróast. Fyrir Covid-ið stækkuðum við hratt og svo var næsta skref að víkka út starfsemina, búa til ferðaskrifstofu á Íslandi til að flytja farþegana út og við sjáum svo alveg um þá,“ segir Svali.

„Við vildum hafa þetta töfrandi – Trip Oz. Ferðatöfrar. Og nú er það orðið að veruleika, ferðaskrifstofan er komin af stað á vefsíðunni Tripoz.is og svo eru Tenerifeferdir.is líka enn vel spriklandi,“ segir Svavar.

„Samhliða þessu verðum við svo með þjónustuskrifstofu sem þjónustar alla sem á þurfa að halda – ekki bara okkar farþega.“

Daníel og Svavar eru guðfeður Sigurðar Kára, yngsta sonar Svala og eiginkonu hans Jóhönnu Katrínar. Mynd/Aðsend

Svavar rekur hárgreiðslustofuna Senter auk þess að stjórna vikulegum útvarpsþætti, Bakaríinu, ásamt Evu Laufeyju Kjaran á Bylgjunni alla laugardagsmorgna svo einhver gæti haldið að það væri nú þegar nóg að gera.

„Mig langaði að tengjast þeim, og inn í þennan bransa. Ég trúi á þetta. Það er alls ekki planið að fara að flytja út á næstunni. Mig langaði bara að vera memm. Og svo er ég að spjalla við fólk í stólnum hjá mér –þau eru í saumaklúbbum, eiga fyrirtæki, eru í golfhópum. Þetta er allt fólk sem er spennt fyrir því sem við erum að gera.“

Fólk vill meira út úr ferðunum

Blaðamaður er sjálfur nýkominn frá Tenerife, og var sú ferð farin með það fyrir augum að gera sem allra minnst. Heilalaust frí. Er það ekki það sem við viljum í sólarlöndum? Bara slaka eins og rostungurinn Wally á bakkanum?

Svali segir að þetta sé að breytast. „Ég hef þjónustað yfir 5.000 manns nú þegar, og margir hafa oft komið til Tenerife en upplifa eitthvað allt annað þegar þeir koma til mín. Svo vill fólk fá meira út úr utanlandsferðum nú þegar við sjáum að þær eru ekki sjálfgefinn lúxus. Sérstaklega þegar til dæmis fjölskyldur fara saman, þegar afi er sjötugur – þá vill fólk gera sér dagamun.

Þessar matur og vín-ferðir sem við höfum boðið upp á eru tilvaldar fyrir slíkt. Fólk vill stuttar hálfsdagsferðir – alltaf smá mat, alltaf smá vín,“ segir Svali.

„Ég hef þjónustað yfir 5.000 manns nú þegar, og margir hafa oft komið til Tenerife en upplifa eitthvað allt annað þegar þeir koma til mín."

Svavar hefur komið oft í heimsókn.

„Fyrst þegar ég kom vildi ég ekkert gera, þjáðist bara af ofsaleti. Svo fór ég að fara í svona einkaferðir, kynnast sögunni og matarmenningunni. Það kom mér á óvart hvað það er hár standard á öllu, sérstaklega, gistingu, þrifnaði og mat,“ segir Svavar.

Allt þetta Tenerifetal er kærkomið þegar haustlægðin geisar fyrir utan.

Félagarnir stjórnuðu lengi vel útvarpsþætti saman og stefna núna á ferðabransann. Mynd/Aðsend

Svali verður úti á Tenerife og Svavar verður á Íslandi.

„Hann er svo mikill sölumaður. Hann getur malað um þetta þegar hann er að dúllast í hárinu á tilvonandi viðskiptavinum.“

Svavar bætir við: „Já, ég er góður í því. En ekki láta mig fá prókúruna, ég er ekki góður í svona „spara pening“ og þannig.“

Þannig að þeir vega hvor annan upp í komandi rekstri?

„Absalút,“ segja þeir samtaka að lokum.