Ætla má að á annað þúsund rafvirkja og rafeindavirkja vanti til starfa hér á landi ef markmið stjórnvalda um kolefnishlutleysi á að ganga eftir fyrir árið 2040.
Þetta kom fram í ávarpi Hjörleifs Stefánssonar, formanns Samtaka rafverktaka (SART), á ráðstefnu í vikunni og bar yfirskriftina Orkumál – horft til framtíðar.
Þar vitnaði hann í fulltrúa frá sænskum systursamtökum SART sem segir að þar í landi vanti 30 þúsund raftæknimenntaða iðnaðarmenn til starfa til að geta mætt loftslagsmarkmiðum sænsku ríkisstjórnarinnar í þessum efnum.
Á ráðstefnunni kom einnig fram í máli Þórs Pálssonar, framkvæmdastjóra Rafmenntar, að iðnskólarnir á Íslandi eru nú þegar keyrðir á fullum afköstum, en þeir fullnýti fjárveitingar sem þeir fái til kennslu í iðngreinum.
Fyrir vikið sé svo komið að fjölmargir komist ekki að í náminu því skólarnir hafa ekki fjármagn til að taka við fleiri nemendum.
Fram kom á ráðstefnunni að 120 til 150 manns ljúka að jafnaði sveinsprófi í rafiðngreinum á ári. Á sama tíma eru hins vegar um það bil 100 rafiðnaðarmenn sem fara á eftirlaun þannig að nettó fjölgun í greininni er sáralítil.
Af þeim sem taka sveinspróf er svo allt að fimmtungur sem heldur áfram í framhaldsnám þannig að einungis er um að ræða árlega fjölgun um 10 til 5 rafiðnaðarmenn.
„Það er því ljóst að ef á að ná markmiðum um kolefnishlutleysi þarf að fjölga rafiðnaðarfólki og þá þurfa skólarnir meiri fjármuni til að geta skilað fleiri faglærðum í rafiðn út á vinnumarkaðinn,“ segir Þór.
