Seg­ir stjórn­in­a að­stoð­a þá rík­ust­u en hunds­a at­vinn­u­laus­a

Færa á vanda atvinnulausra yfir á sveitarfélög sagði Guðmundur Ingi Kristinsson, þingmaður Flokks fólksins, í óundirbúinni fyrirspurn til Ásmundar Einars Daðasonar, félags- og barnamálaráðherra á Alþingi í dag.

Guðmundur Ingi sagði hundrað manns fullnýta atvinnuleysisbótarétt sinn og á síðasta ári hafi um þúsund manns dottið út af atvinnuleysisbótum. Tvö ár taki að vinna sér inn bótarétt aftur og „greinilega á að færa þennan vanda ríkisstjórnarinnar yfir á sveitarfélögin,“ sagði Guðmundur Ingi.

Um 500 manns hafi óskað eftir fjárhagsaðstoð Reykjavíkurborgar og um 300 á Reykjanesi. Flestir þeir sem missa bótarétt hjá Vinnumálastofnun leiti á náðir borgarinnar og sveitarfélaga. Þau hafi ekki burði til að takast á við þennan vanda. Hann sakaði félags- og barnamálaráðherra um að draga lappirnar í málefnum atvinnulausra.

Hins vegar hafi ríkis­stjórnin ekki verið lengi að því að að­stoða þá „sem hafa borgað sig milljarða króna í arð og vita ekki aura sinna tal,“ sagði Guð­mundur Ingi. „Þeir sem detta út af bótum eiga sér enga von um að fá fæði, klæði eða borga af hús­næði,“ bætti hann við.

„Neyðin vex og við verðum að fara að gera eitt­hvað fyrir þetta fólk. Við getum ekki hent fólki út á guð og gaddinn og sagt við það: Þið fáið ekkert, svo til ekkert, vegna þess að ef þau fara til sveitar­fé­laganna og annarra aðila hefur ein­hverjar tekjur þá fáum þau ekkert,“ sagði þing­maðurinn og spurði ráð­herra til hvaða ráða hann hygðist grípa til að að­stoða sveitar­fé­lög við að styðja fólk sem missir at­vinnu­leysis­bætur.

Vonast til að kynna aðgerðir á næstu tveimur vikum

Ás­mundur Einar sagði verið unnið að því að koma fram með ýmsar að­gerðir til að hjálpa þeim sem eru án at­vinnu, í sam­vinnu við sveitar­fé­lög. „Við höfum verið að vinna að því undan­farnar vikur að forma ein­hvers konar að­gerðir til þess að ná utan um þessa ein­stak­linga til þess að að­stoða þá við að komast í virkni og tryggja þeim fram­færslu sam­hliða,“ sagði ráð­herra. Hann vonaðist til þess að að­gerðir yrðu til­kynntar á næstu tveimur vikum.

Guð­mundur Ingi sagði að í fyrsta sinn væri meira at­vinnu­leysi hér en á hinum Norður­löndunum. „Á sama tíma er ekkert vanda­mál að borga þeim sem hafa fengið milljarða í arð milljarða. Hvernig í ó­sköpunum stendur á því að það þarf að hjálpa þeim en það er ekki hægt að hjálpa þessum, það sé svo erfitt,“ sagði þing­maðurinn.

Ráðherra sagði að ástæða þessa mikla atvinnuleysis sem sé hér á landi nú, en það er rúmlega 12 prósent, sé einkum hve stór þáttur ferðaþjónustan er í íslensku atvinnulífi sem farið hafi illa út úr COVID-19 faraldrinum. Nauðsynlegt sé að ríki og sveitarfélög starfi saman í að leysa vanda þeirra sem misst hafi bótarétt. „Ég hlakka gríðarlega til þegar við getum kynnt slíkar aðgerðir,“ sagði Ásmundur Einar.