Jóhannes Þór Skúlason, framkvæmdastjóri Samtaka ferðaþjónustunnar, segir að íslensk stjórnvöld verði að muna hvernig ferðaþjónustan hafi átti stóran þátt að koma Íslandi upp úr þeirri kreppu sem skall á eftir fall íslenska bankakerfisins árið 2008 og það efnahagshrun sem fylgdi því.

Jóhannes Þór segist hafa orðið var við það mat að nú þurfi að byggja upp annan atvinnuveg þar sem ferðaþjónustan geti ekki orðið einn af grunnatvinnuvegunum vegna kórónaveirufaraldursins næstu misserin. Hann bendir þar sem dæmi á orð Sigríðar Benediktsdóttur, doktors í hagfræði og Jóns Daníelssonar, prófessors í hagfræði sem birtust í fréttaskýringaþættinum Kveik í gærkvöldi.

„Þessa dagana birtast hér og þar frasar um að nú sé ferðaþjónustan horfin og þá verði Íslendingar bara að byggja upp annan atvinnuveg til að framfleyta sér. Það gangi ekki að hafa eggin alltaf í einni körfu. Síðast mátti sjá Sigríði Benediktsdóttur og Jón Daníelsson tala á þessum nótum í Kveik í kvöld," segir Jóhannes Þór í færslu á facebook-síðu sinni.

„En skoðum nú hversu líklegt þetta er í raun. Áratugum saman var það helsta ósk íslenskra stjórnmálamanna og efnahagsspekúlanta að atvinnulíf á Íslandi yrði fjölbreyttara, að við fengjum eitthvað fleira en fisk og ál - "eitthvað annað". Og svo fengum við ýmsan tækniiðnað og nýsköpun í lok síðustu aldar sem var frábært, og uppbygging þeirra byggði ekki síst á tengslum við eldri greinar, t.d. sjávarútveg og á tækniþekkingu, sem er líka frábært. Efnahagstölur á Íslandi breyttust vissulega, en undirliggjandi hegðan efnahagskerfisins hélst í grunninn svipuð," segir hann enn fremur.

Ferðaþjónustan sannaði gildi sitt í hruninu

Framkvæmdastjórinn segir að ferðaþjónustan hafi bjargað Íslandi úr hruninu árið 2008 og brugðist við eftirspurninni um meiri fjölbreytni í atvinnuvegi landsins.

„Svo kom skellur 2008 og í kjölfar hans birtist ferðaþjónustan allt í einu, nánast yfir nótt, óx, fjárfesti og byggði upp og réði fólk í vinnu um allt land og allt í einu fengu stjórnmálamenn og efnahagslífið þetta "eitthvað annað" sem búið var að bíða eftir áratugum saman óvænt upp í hendurnar.

Og ferðaþjónustan óx og óx, varð stærsta atvinnugrein landsins, varð mikilvægasta byggðaaðgerð Íslandssögunnar með uppbyggingu atvinnutækifæra og lífsgæða um allt land, hóf að sækja gjaldeyristekjur fyrir þjóðarbúið í stórum stíl og lagði þar með grunn að stöðugra gengi krónunnar, fór að skila jafnvirði heils landsspítala á ári í nettó skatttekjur í sjóði ríkis og sveitarfélaga og færði stjórnmálamönnum loks hinn heilaga gral íslensks efnahagslífs - viðvarandi jákvæðan vöru- og þjónustujöfnuð (sem hafði áður gerst einu sinni, árið1947) - og þar með meiri stöðugleika. Íslenskt efnahagslíf var allt í einu orðið líkara Þýskalandi en Grikklandi. Og á grundvelli þess stöðugleika hefur orðið fordæmalaus kaupmáttaraukning og lífskjarabót undanfarin 10 ár," segir hann.

Vonast eftir sértækum aðgerðum fyrir ferðaþjónustuna

Jóhannes Þór telur að ekki sé hægt að tala um ferðaþjónustuna sem skyndilausn sem eigi að henda í burtu þegar harðna fer tímabundið á dalnum tímabundið vegna ytri aðstæðna sem greinin hafi ekki stjórn á.

„Lærdómurinn af þessari sögu er einfaldur. Ferðaþjónustan er engin offjárfestingabóla. Ferðaþjónustan er fjölbreytnin í atvinnulífinu sem við biðum eftir áratugum saman, kvik grein sem hefur alla burði til að vera ein af stóru aflvélum efnahagskerfisins til framtíðar. Hún er þess vegna besta leiðin til að keyra íslenskt efnahagslíf í gang að nýju þegar þessari kórónakreppu lýkur og þar með besti möguleikinn sem við eigum til að verja með kjafti og klóm þær ótrúlegu lífskjarabætur sem við höfum byggt upp undanfarin 10 ár - einmitt á grundvelli ferðaþjónustunnar.

Við viljum fjölbreytt atvinnulíf. Við viljum sterkan alþjóðageira, meiri nýsköpun, öflugan iðnað, stærri hátæknigeira, framsækinn sjávarútveg, hágæða þjónustugreinar o.s.frv. Það er afar mikilvægt að þetta vinni allt saman í fjölbreyttu atvinnulífi. Allt styður þetta hvert annað og ferðaþjónustan er á síðasta áratug orðin einn mikilvægasti hlekkurinn í því samspili sem byggir undir lífskjör og velferð á Íslandi. Það væri glapræði að taka ekki ákvarðanir núna sem tryggja að hún verði það áfram. Það mun nefnilega ekkert "eitthvað annað" koma skyndilega í staðinn fyrir hana núna. Við biðum í áratugi, þið munið?," segir Jóhannes Þór sem hefur væntingar til þess að ríkisstjórnin grípi til aðgerða sem tryggja ferðaþjónustuna í sessi næstu áratguna í næsta aðgerðarpakka sínum vegna kórónaveirunnar.