Úrskurður innri endurskoðunar um að uppsögn Áslaugar Thelmu Einarsdóttur, fyrrverandi forstöðumanns Orku Náttúrunnar, hafi verið réttmæt kemur henni algerlega í opna skjöldu.

Áslaug Thelma Einarsdóttir hafði ekki heyrt af þeirri niðurstöðu innri endurskoðunar að uppsögn hennar hjá Orki náttúrunnar hafi verið réttmæt þegar Fréttablaðið náði tali af henni rétt í þessu.

Sjá einnig: Uppsögn Áslaugar Thelmu metin réttmæt

Niðurstaðan kemur henni algerlega í opna skjöldu en hún vill að öðru leyti ekki tjá sig frekar um úrskurðinn að óathuguðu máli. Fyrsta skref er að fá þessa niðurstöðu staðfesta.

Fréttablaðið greindi fyrir skömmu, fyrst allra miðla, frá því að innri endurskoðun teldi uppsögnina réttmæta en Helga Jónsdóttir, starfandi forstjóri Orkuveitu Reykjavíkur, kynnti starfsfólki fyrirtækisins niðurstöðurnar með tölvupósti í dag.

Blaðamannafundi Orkuveitunnar þar sem niðurstöðurnar voru kynntar nánar er nýlokið. Áslaug Thelma var ekki á fundinum og upplýsti á Facebook fyrr í dag að hún hefði einungis frétt af fundinum í fjölmiðlum.

„Ég les eins og aðrir í fjölmiðlum að skýrsla rannsóknar Innri endurskoðunar Reykjavíkurborgar verður kynnt á blaðamannafundi í dag kl 15:00 hjá Orkuveitunni. Ég hef ekki séð lokaskýrsluna og mér var ekki gert viðvart um að hún og þá væntanlega gögn um mína persónulegu hagi yrðu gerð opinber í dag.“