Sælkerinn og fagurkerinn María Gomez lætur sig reglulega dreyma um að skipta út öllu jólaskrauti sínu og kaupa allt í stíl en guggnar alltaf enda skrautið farið að hafa tilfinningalegt gildi.

María segist í dag aðallega upplifa jólin í gegnum börnin sín.

„Sem barni fannst mér heil eilífð líða á milli jóla og tilhlökkunin því mikil. Þá var ekki jólaskreytt fyrr en í fyrsta lagi á aðventunni og jólatréið sett upp á Þorláksmessu. Á fullorðinsárum finnst mér nánast vera komin jól aftur þegar maður er nýbúinn að taka niður jólaskrautið. Tíminn líður líka svo hratt svo mér finnst alltaf vera jól. Núna upplifi ég jólin meira í gegnum börnin mín og gegnum þeirra tilhlökkun og spennu.“

Stílhreint og látlaust jólaborð að hætti Maríu Gomez. Mynd/María Gomez

Hvernig jólaskrauti skreytirðu með?

Ég er alltaf að láta mig dreyma um að kaupa mér jólaskraut sem er tímalaust og látlaust og þar sem allt er í stíl. Þegar ég ætla svo að ráðast í að skipta þessu út guggna ég alltaf þar sem skrautið er farið að hafa tilfinningalegt gildi fyrir mig og alla fjölskylduna. Það er allt úr sitthvorri áttinni rautt, gyllt, kremað og bara nefndu það svo það er bara hirs og her stemning í mínu skrauti,“ segir María sem var rétt að byrja að skreyta þegar ljósmyndara Fréttablaðsins bar að garði og enn var stemningin frekar látlaus á miðri aðventu og lítið fór fyrir því sem hún hér lýsir.

Fjölskyldan festi nýverið kaup á húsi í Garðabænum sem þau gerðu upp að miklu leyti. Þessi fallegi arinn mun sannarlega vera nýttur um jólin. Mynd/María Gomez

Hvaða hefð er ómissandi?

Það er að baka engiferkökurnar hennar tengdó, sykurpúðasalat með hamborgarahryggnum og svo jólamaturinn sjálfur þar sem engu má breyta barnanna vegna.


Hvað borðið þið á aðfangadag?

Það er alltaf hamborgarhryggur og sykurgljáðar kartöflur og sykurpúðasalat á aðfangadag. Það hefur líka skapast sú hefð hjá okkur hjónum að hafa nýbakað baguette, osta, ólífur og graflax í brunch á aðfangadagsmorgun eða hádegi.

Fallegu jólaskrauti raðað saman ofan á stofuskápinn.
Spænski sparigrauturinn og heita súkkulaðið sómir sér vel í fallegu Mumin-stellinu. Mynd/María Gomez
Stílhreint og fallegt. Mynd/María Gomez

Arroz con Leche - spænskur spari grjónagrautur


María heldur úti vefsíðunni paz.is þar sem hún birtir reglulega girnilegar uppskriftir. Þar sem María á ættir að rekja til Spánar slæðast oft spænsk áhrif með og fengum við hana til að deila með lesendum spænskum spari grjónagraut sem á vel við á jólum.


„Arroz con Leche er í miklu uppáhaldi hjá mér, en það er spænskur grjónagrautur í ætt við möndlugraut eða rísmjólk, nema mér finnst þessi svo mikið betri. Á Spáni er Arroz con leche ekkert sérstaklega tengt jólunum en það er meira notað sem eftirréttur og er grauturinn borðaður kaldur. Þar sem grauturinn er mjög sætur er hann eingöngu kryddaður með kanil en ekki kanilsykri. Ég mæli með að þið prófið að gera hann á aðventunni og lofa að krakkarnir munu líka elska hann.“

Arroz con leche er spænskur sparigrautur og tilvalinn á aðventu eða jólum. Mynd/María Gomez

Uppskrift fyrir fjóra

150 gr grjón (best að nota stór og feit grjón eins og notað er í risotto)

300-400 gr vatn

½ tsk salt

1 dós niðursoðin mjólk (Condensed milk, fæst í kínadeild verslana)

7-8 dl nýmjólk

½ tsk vanilludropar

2 ræmur af appelsínubörk (ekki raspa heldur skræla 2x 10 cm ræmur og sem minnst af hvíta partinum undir)

1 ræma sítrónubörkur (ekki raspa heldur skræla)

1 stk kanilstöng

Hreinn kanill (ekki kanilsykur)

Aðferð

  1. Byrjið á að sjóða grjónin með vatni og salti í sirka 15-20 mínútur eða þar til allt vatn er gufað upp.
  2. Bætið þá allri mjólkinni og vanilludropum út í og hrærið saman.
  3. Skrælið svo börkinn af appelsínu og sítrónu í eins og sirka 10 sentímetra ræmur og setjið út í (börkurinn er hafður heill en ekki raspaður því hann er svo veiddur upp úr og honum hent).
  4. Setjið á sama tíma kanilstöngina með og látið byrja að sjóða við lágan til meðalhita.
  5. Hrærið í mjög reglulega á meðan suðan er að koma upp svo brenni ekki við botninn á pottinum og lækkið svo hitann þegar suðan er komin upp.
  6. Sjóðið í 40-50 mínútur eða þar til grjónin eru vel mjúk og passið að hræra reglulega í, á meðan.
  7. Að suðutíma liðnum er börkur og kanilstöng veitt up úr með gaffli og hent.
  8. Skammtið graut í fallegar desertskálar og látið kólna uppi á borði.
  9. Setjið þá tóman kanil í þunni lagi og alls ekki of mikið yfir grautinn og kælið í ísskáp

10.Grautinn má líka borða eftir að hafa kólnað við stofuhita en þannig eða úr kæli er hann langbestur.