Guðfræðingurinn Bjarni Randver Sigurðsson upplifði „sjálfshjálparvakningarsamkomuna“ sem Alda Hrönn Hjaltalín stóð fyrir í Laugardalshöll í gærkvöldi sem trúarsamkomu.

Í færslu á Facebook greinir hann frá upplifun sinni af því að hafa farið á viðburðinn.

Alda Hrönn hefur verið harðlega gagnrýnd af fagfólki fyrir að láta í veðri vaka að til séu skyndilausnir við geðsjúkdómum á borð við þunglyndi.

Bjarni segir í færslunni að hann hafi upplifað samkomuna sem trúarsamkomu: „Engin trúarbrögð voru þó nefnd til sögunnar og engu þarna var beint gegn nokkrum trúarbrögðum. Og þó svo að þetta hafi virkað sem trúarsamkoma á mig efast ég um að það hafi gilt um aðra viðstadda nema í undantekningartilfellum.“

Hann segir að „Ég er nóg“ fyrirlestur Öldu Karenar hafi verið einlægur en að hæglega megi skilgreina það sem þarna fór fram sem „audience cult“ en hann skýrir hvað hann á við með því.

Bjarni segir að fyrirlestrarnir hafi reynst ósköp saklausir og viðtölin ágætlega áhugaverð. Ekkert kom fram sem í raun geti talist varhugavert. „Alda Karen hefur verið gagnrýnd fyrir óvarlega eða illa ígrundaða framsetningu í kynningu sinni á þessu námskeiði en reyndi greinilega að vanda sig þegar að því kom. Engum töfralausnum var heitið, engir læknar eða sálfræðingar voru gagnrýndir og engu var afneitað í vestrænum heilbrigðisvísindum. Allt það fólk sem kom þarna fram virkaði á mig sem góðviljaðir einstaklingar sem vildu gera sér grein fyrir eigin takmörkunum og miðla áfram þeirri reynslu og þeim þroska sem þeir hefðu þegar náð að afla sér í von um að fleiri taki sjálfa sig í sátt og læri að elska sjálfa sig á heilbrigðan hátt.“