UNICEF á Íslandi sendi frá sér yfirlýsingu í gærkvöldi vegna brottvísunar albanskrar fjölskyldu úr landi og benda þar á skyldur íslenskra stjórnvalda til að meta það sem barni er fyrir bestu þegar ákvarðanir eru teknar.

„Á þetta við um allar ákvarðanir, um öll börn, á öllum stjórnsýslustigum og við allar aðstæður,“ segir í yfirlýsingunni.

Þar segir að brottflutningur fólks vegna ákvarðana sem byggja á lögum um útlendinga feli í eðli sínu nauðung sem geti haft varanleg áhrif á bæði líf og þroska barns „ef illa er að málum staðið“.

„UNICEF á Íslandi hvetur embætti Ríkislögreglustjóra til þess að endurskoða verklag við brottflutning fjölskyldna og fræða starfsfólk um réttindi barnsins. Starfsfólk UNICEF býður fram aðstoð við slíka fræðslu og samtal um framkvæmd laga og reglna er varða börn sem flutt eru nauðug úr landi,“ segir í yfirlýsingunni.

Þá lýsa þau yfir stuðningi við áætlanir dómsmálaráðherra og embættis landlæknis sem hafa sagt að þau ætli að kanna brottflutning albönsku fjölskyldunnar.

„UNICEF hefur áhyggjur af aðgengi umsækjenda um alþjóðlega vernd að heilbrigðisþjónustu á Íslandi. Fyrr á árinu ræddi UNICEF við fjölda barna og foreldra sem sótt hafa um alþjóðlega vernd á Íslandi og kom skýrt fram að aðgengi að heilbrigðisþjónustu er skert og hefur það í einhverjum tilfellum leitt alvarlegs heilsubrests,“ segir í yfirlýsingunni.

Þá benda þau að lokum „enn og aftur á að lög, reglur og samningar, sem tryggja réttindi barna sem sækja um vernd, eru í gildi á Íslandi. Framkvæmd laganna þarf hins vegar að bæta á öllum sviðum, með skýrum skilaboðum ríkisstjórnarinnar um að réttindi barna séu virt á Íslandi.“