Forsvarsmenn Samskipa undrast það að Efling skuli beina fyrirhuguðum verkfallsaðgerðum einungis að einu fyrirtæki á flutningamarkaði. Þetta kemur fram í tilkynningu frá Samskipum.
Eins og fram hefur komið tilkynnti Efling fyrr í dag að samþykkt hefðu verið verkfallsboðanir í gær sem annarsvegar taka til fleiri starfsmanna hótelkeðja og hinsvvegar til bílstjóra flutningabíla og olíudreifingar.
Forsvarsmenn Samskipa vonast til þess að ekki komi til verkfalls en undrast það að Efling skuli beina aðgerðum sínum að einungis einu fyrirtæki á flutningamarkaði, að því er segir í tilkynningunni.
Þá kemur þar fram að unnið sé að því að draga úr áhrifum á þjónustu við viðskiptavini Samskipa komi til verkfalls. Atkvæðagreiðsla um verkfallið hefst á hádegi næstkomandi föstudag og stendur til klukkan 18:00 á þriðjudag
Segjast forsvarsmenn Samskipa að lokum ekki tjá sig frekar um málið að svo stöddu. Kjaraviðræður við Eflingu séu í höndum Samtaka atvinnulífsins.
Tilkynning Samskipa í heild sinni:
Samninganefnd Eflingar stéttarfélags samþykkti á fundi sínum í gær verkfallsboðanir sem taka annars vegar til starfsmanna hótelkeðjunnar Berjaya Hotels og hótelsins The Reykjavík Edition og hins vegar til bílstjóra flutningabifreiða og til olíudreifingar.
Hjá Samskipum tekur verkfallsboðunin til aksturs flutningabifreiða sem gerður er út frá höfuðstöðvum fyrirtækisins í Reykjavík.
Forsvarsmenn Samskipa vonast til þess að ekki komi til verkfalls en undrast það að Efling skuli beina aðgerðum sínum að einungis einu fyrirtæki á flutningamarkaði.
Atkvæðagreiðsla um verkfallið hefst á hádegi næstkomandi föstudag og stendur til klukkan 18:00 á þriðjudag. Verði boðun verkfallanna samþykkt hefst vinnustöðvun á hádegi 15. febrúar. Unnið er að því að draga úr áhrifum á þjónustu við viðskiptavini Samskipa komi til verkfalls.
Kjaraviðræður við Eflingu eru í höndum SA og munu forsvarsmenn Samskipa ekki tjá sig frekar um málið að svo stöddu.
