Ríflega 96% Íslendinga telja stjórnvöld vera að takast vel á við COVID-19. Þetta kemur fram í nýjum þjóðarpúls Gallups og er hlutfallið hvergi hærra í heiminum. Hlutfallið er lang lægst í Tælandi og Japan en Bandaríkin og Rússland koma þar á eftir. Um 19% Tælendinga telja stjórnvöld í heimalandi sínu vera takast vel á við veiruna, um 22% Japana og um 50% Bandaríkjamanna. Síðan í mars hefur hlutfallið hækkað mest í Þýskalandi, eða um 26 prósentustig, en lækkað mest á Ítalíu, úr 73 prósentustigum niður í 67 prósentustig.

Nær 85% Íslendinga eru hræddir um að annað hvort þeir eða einhver í fjölskyldu þeirra gæti smitast af COVID-19. Aðeins í Indónesíu, Argentínu, Suður-Kóreu og á Filippseyjum er hlutfallið hærra af þeim löndum sem tóku þátt í könnuninni. Síðan í mars hefur hlutfall þeirra sem óttast smit hækkað mest í Bandaríkjunum, eða um 25 prósentustig, en lækkað mest á Ítalíu og í Rússlandi.

Afar fáir telja ógnina af COVID-19 ýkta

Aðeins 7% Íslendinga telja að sú ógn sem stafar af COVID-19 sé ýkt og er hlutfallið hvergi lægra, en hæst er það í Pakistan. Nær alls staðar hefur hlutfall þeirra sem telja ógnina ýkta lækkað síðan í mars en mest hefur það lækkað í Bandaríkjunum og Þýskalandi, eða um 36 og 34 prósentustig. Tæplega 84% Íslendinga eru tilbúin að fórna einhverjum mannréttinda sinna ef það hjálpar til við að koma í veg fyrir útbreiðslu COVID-19. Hæst er hlutfallið á Indlandi, eða 96%, en lang lægst í Japan, eða 49%. Þó hlutfallið sé einna lægst í Bandaríkjunum hefur það hækkað mest þar síðan í síðasta mánuði.

Rúmlega sex af hverjum tíu Íslendingum telja að heimurinn muni hverfa nokkurn veginn til fyrra ástands þegar COVID-19 faraldurinn er genginn yfir, en tæplega fjórir af hverjum tíu telja að það verði miklar breytingar í kjölfar faraldursins og heimurinn verði nánast gjörbreyttur. Hlutfall þeirra sem telja að heimurinn verði mjög breyttur eftir faraldurinn er einna hæst á Filippseyjum og Ítalíu þar sem hátt í tveir af hverjum þremur telja það.

Yfir helmingur telja samskipti einkennast af samvinnu

Nær 65% Íslendinga telja að samskipti valdamestu ríkja heims muni einkennast af meiri samvinnu eftir COVID-19 faraldurinn á meðan rúmlega 35% telja að þau muni einkennast af meiri árekstrum.

Nær 92% Íslendinga telja að útbreiðsla veirunnar hafi orðið með náttúrulegum hætti en nær 8% telja að erlendir aðilar eða önnur öfl hafi viljandi valdið útbreiðslu kórónuveirunnar sem veldur COVID-19. Hlutfall þeirra sem telja útbreiðslu veirunnar ekki hafa orðið með náttúrulegum hætti er afar misjafnt eftir löndum en er lægst á Íslandi. Hæst er það í Armeníu en þar telja sjö af hverjum tíu að útbreiðslan hafi ekki orðið með náttúrulegum hætti.

Niðurstöður um Ísland eru úr netkönnun Gallup sem gerð var dagana 3. - 14. apríl 2020. Þátttökuhlutfall var 53,6%, úrtaksstærð 2.963 einstaklingar 18 ára eða eldri af öllu landinu valdir af handahófi úr Viðhorfahópi Gallup. Kannanir í öðrum löndum voru gerðar á svipuðu tímabili, fyrir utan spurninguna um hvort útbreiðsla veirunnar hafi orðið með náttúrulegum hætti eða ekki, en hennar var spurt erlendis í mars. Þar sem sýnd er þróun var spurninganna einnig spurt erlendis í mars.