Hérasðdómur Reykjavíkur hefur dæmt tvenn ummæli sem Aldís Schram lét falla um föður sinn Jón Baldvin Hannibalsson, fyrrverandi ráðherra og sendiherra, dauð og ómerk. Dómur var kveðinn upp í dag í héraðsdómi og greinir Mbl.is frá.

Jón Baldvin krafðist þess að fjórtán ummæli yrði dæmd dauð og ómerk, tíu hjá Aldísi og fern hjá Sigmari Guðmundssyni fjölmiðlamanni úr viðtali Sigmars við Aldísi í Morgunútvarpinu á Rás 2. þann 17. janúar árið 2019.

Um­mæl­in sem eru dæmd ómerk eru: „Fíkn, auðvitað er barnagirnd fíkn, þetta er fíkn“ og „ ... og sigra hann og hans barn­aníðinga­banda­lag.“

Sig­mari var stefnt fyr­ir fern um­mæli úr þætt­in­um og Jón Bald­vin krafði hann um 2,5 millj­ón­ir króna. Sigmar var sýknaður af stefnu Jóns Baldvins en hann segir niðurstöðuna fullkomlega í takt við það sem hann átti von á.

„Ég átti von á þessu. Það er ekki hægt að dæma blaðamann fyrir ummæli viðmælanda,“ segir Sigmar í samtali við Fréttablaðið.

Aðspurður segist hann standa við viðtalið. Fullt tilefni hafi verið til að fjalla um hlið Aldísar í þessu máli enda hafi umfjöllunin ekki orðið til í tómarúmi. Meint ólögmæt frelsissvipting Aldísar og meint sifjaspjell Jóns Baldvins hafi sannarlega átt erindi við almenning, sérstaklega í ljósi umræðunnar sem var í gangi árið 2019 í Me Too-byltingunni þar sem margar tugir frásagna höfðu komið fram um meint brot Jóns Baldvins.

Ummælin sem Jón krafðist ómerkingar á:

Rás 2, 17. janúar 2019, ummæli Aldísar:

  • ... hann fær mig undir fölsku yfirskini að heimsækja afa minn ... mér var haldið inni þarna í mánuð sem sagt ólöglega.
  • ... já. Fimm sinnum á næstu 10 árum kastast í kekki milli mín og Jóns Baldvins Hannibalssonar og því lyktaði ávalt með því að (sic) sigaði á mig lögreglu sem handtók mig, hann er náttúrlega utanríkisráðherra ...
  • Hann gat bara þaðan í frá, þáverandi utanríkisráðherra og síðar sendiherra, virðist vera að hringja bara í lögreglu og þá var ég þar með handtekin, umsvifalaust í járnum, farið með mig upp á geðdeild ...
  • ... hann er þá líka að misnota lítil börn.
  • ... ég neita að skilja þau eftir í umsjón karls sem káfar á litlum stúlkubörnum.
  • Og sem sagt 10 mínútum eftir að ég kæri Jón Baldvin þá hringir dyrabjallan. Þar ruddust þarna inn tveir lögreglumenn ef ekki þrír og ég, þegar ég sé það þá reyni ég að loka en auðvitað tókst mér það ekki, þeir ryðjast þá þar með inn og þeir svara mér engu, ryðjast inn í stofu þar sem dóttir mín 5 ára gömul er að lesa og þegar barnið er tekið frá mér þá verð ég æf.
  • ... það er faðir minn sem stendur fyrir því að hér eigi að loka mig inni.
  • Fíkn, auðvitað er barnagirnd fíkn, þetta er fíkn.
  • ... nauðungarvistun án dóms og laga er þá ólögmæt frelsissvipting ...

Facebook, 5. febrúar 2019, höfundur Aldís:

  • ... og sigra hann og hans barnaníðingabandalag.

Rás 2, 17. janúar 2019, höfundur og flytjandi Sigmar (Aldís til vara):

  • ... að Jón Baldvin hafi notað aðstöðu sína sem sendiherra til að láta nauðungarvista hana á geðdeild.
  • Sá fundur Aldísar og Jóns Baldvins segir hún hafa reynst sér örlagaríkur og orðið til þess að hún var í fyrsta sinn nauðungarvistuð á geðdeild.
  • ... að Jón Baldvin hafi sett sig í samband við félagsmálayfirvöld og geðdeild með það fyrir augum að fá hana nauðungarvistaða í enn eitt skiptið.
  • Þar segir hún einnig að Jón Baldvin hafi framið sifjaspell þegar hún var fullorðin kona.