Tveir fullorðnir einstaklingar hafa smitast af E. coli sýkingu. Embætti landlæknis sendi frá sértilkynningu um þetta en í dag voru rannsökuð sýni af 14 einstaklingum sem voru grunaðir um sýkingu.

Niðurstöður benda þannig til að tveir fullorðnir einstaklingar séu sýktir en ekki er búið að staðfesta hvort um sömu bakteríu sé að ræða og hjá börnunum sem áður hafa greinst með sýkinguna. Niðurstöður slíkra staðfestingarprófa geta tekið allt að tvo til þrjá daga.

Þá má vænta niðurstaðna úr faraldsfræðilegum rannsóknum á tengslum þessara tveggja einstaklinga við Efstadal á næstu dögum.

Um er að ræða fyrstu fullorðnu einstaklingana sem greinast með E. coli sýkingu eftir að smit barnanna, sem höfðu neytt íss frá Efstadal, kom upp. Þannig hafa 19 börn greinst með sýkinguna en ekkert þeirra er nú inniliggjandi á Barnaspítala Hringsins. Enn er beðið eftir frekari staðfestingu á greiningu hjá barninu í Bandaríkjunum sem er grunað um alvarlega E. coli sýkingu.

Þá er búist við að E. coli faraldurinn sé að renna sitt skeið en þessi vika mun að líkindum skera úr um það.