Að minnsta kosti tuttugu einstaklingar eru komnir í fjöldahjálparstöðina sem Rauði krossinn opnaði í íþróttahúsinu við Sunnubraut í Reykjanesbraut í morgun vegna veðurs og von er á fleirum.
Þetta staðfestir Oddur Freyr Þorsteinsson, kynningar- og fjölmiðlafulltrúi hjá Rauða krossi Íslands. Þrír starfsmenn frá Reykjavík eru á leiðinni til Keflavíkur í fylgd björgunarsveita.
Oddur Freyr gerir ráð fyrir að fleiri þurfi að leita í fjöldahjálparstöðina. „Þetta virðist vera töluverður fjöldi af fólki sem er fast á Reykjanesbraut svo mér finnst sennilegt að þetta verði smá fjöldi.“
Að sögn Odds Freys er nú einnig unnið að því að opna fjöldahjálparstöð á Hellu. Aðspurður hve lengi er gert ráð fyrir að fjöldahjálparstöðin verði opin segir Oddur Freyr það eiga eftir að koma í ljós.
„Það mun bara koma í ljós, fer eftir fjölda fólks sem þarf aðstoð og hvernig gengur að koma því í hús annars staðar,“ segir Oddur Freyr og bætir við:
„Þetta eru mjög víðtækar aðgerðir sem eru í gangi í samstarfi við Landsbjörg og björgunarsveitir þannig að það verður örugglega hasar í dag. En það er allt í gangi og þetta fer örugglega allt saman farsællega.“
Greint var frá því í morgun að Reykjanesbrautinni hafi verið lokað alfarið um níuleytið en fjöldi verkefna björgunarsveitanna hefur verið gífurlegur.
Björgunarsveitir sendu snjóbíl ásamt tveimur stærri trukkum á Reykjanesbraut til að aðstoða vegfarendur sem sitja þar fastir.
Lögreglan á Suðurnesjum hefur sent frá sér enn eina ítrekunina í morgun þar sem fólk á vanbúnum bílum er beðið um að vera ekki á ferðinni og vegfarendur beðnir um að virða lokanir.
Öllu innanlandsflugi hefur verið aflýst í dag sem og öllu morgunflugi frá Keflavík.
Gular veðurviðvaranir eru í gildi á öllu landinu og appelsínugul viðvörun er á Suðausturlandi.
Ert þú með ábendingu vegna veðursins? Sendu okkur tölvupóst á ritstjorn@frettabladid.is.
