Jemen

Tugir barna féllu í loftárásum Sádi-Araba og bandamanna

Tugir barna féllu í loftárás hernaðarbandalags Sádi-Araba á Jemen. Átökin hafa verið einkar blóðug undanfarnar vikur. Friðarviðræður mögulega á döfinni. Ástand mannúðarmála í Jemen sagt það versta í heiminum og fjölmargir á barmi þess að svelta.

Jemenskt barn fær aðhlynningu á sjúkrahúsi í Saada-fylki en 29 börn létust í loftárásinni.

Sádiarabíski herinn og bandamenn hans í stríðinu í Jemen felldu í gær tugi í loftárásum á Saada-fylki. Á meðal fórnarlamba árásanna voru börn sem ferðuðust saman í rútu. Frá þessu greindi alþjóðaráð Rauða krossins. „Tugir eru fallnir og hinir særðu fá aðhlynningu [...] Meirihluti sjúklinganna er undir tíu ára aldri,“ tísti ráðið.

Ráðið sagði starfsmenn reyna að bjarga eins mörgum og unnt væri. Hins vegar héldi tala látinna áfram að hækka. Nú þegar hafi verið tekið á móti líkum 29 barna, allra innan við fimmtán ára, og 48 særðum, þar af 30 börnum.

Sádi-Arabar sögðust í gær hafa beint árásinni að eldflaugaskotpöllum sem notaðir hafa verið til að skjóta á sádiarabísku borgina Jizan. Voru Hútar, uppreisnarmennirnir sem hernaðarbandalagið berst gegn í Jemen, jafnframt sakaðir um að nota börn til að skýla sér fyrir skothríðinni.

„Árás dagsins í Saada var lögmæt hernaðaraðgerð og var gerð í samræmi við alþjóðalög,“ sagði í yfirlýsingu hersins sem birtist á ríkisfréttastöðinni SPA.

Al-Masirah, sjónvarpsstöð Húta, sagði á Twitter í gær að 39 hefðu fallið í árásunum og 51 særst. Hútar vildu þó ekki svara ásökunum Sádi-Araba um að hafa notað börn sér til varnar. Sagði miðillinn börnin í rútunni hafa verið á leið á námskeið um Kóraninn.

Loftárásir voru einnig gerðar á hafnarborgina Hodeidah síðasta fimmtudag. Fórust þá 55 í árásum hernaðarbandalagsins að því er uppreisnarmenn greindu frá. Tala látinna var þó nokkuð á reiki, Reuters sagði 28 hafa fallið en kínverski miðillinn Xinhua sjötíu.

Í kjölfarið bauð Martin Griffiths, erindreki Sameinuðu þjóðanna í Jemen, fylkingunum til friðarviðræðna í Sviss. Óvíst er hvort þær viðræður bera árangur, en síðustu viðræður fóru fram í Kúveit fyrir tveimur árum.

Mæti sendifulltrúar fylkinganna til viðræðna munu þær hefjast þann 6. september næstkomandi í Genf.

Hernaðarbandalagið hefur gert fjölda loftárása á Jemen undanfarið. Samkvæmt Al Jazeera voru 258 árásir gerðar í júnímánuði einum. Þar af þriðjungur á skotmörk ótengd hernaði. Yemen Data Project greindi frá því að 24 árásir hafi verið gerðar á íbúabyggð, þrjár á vatns- og rafmagnsinnviði og þrjár á sjúkrahús.

AP greindi frá því fyrr í vikunni að hernaðarbandalagið hafi gert leynilega samninga við hryðjuverkasamtökin al-Kaída í Jemen og ráðið til sín hermenn úr þeirra röðum.

Heimildarmenn sögðu frá því að Bandaríkjamenn, sem styðja hernaðarbandalagið, hafi vitað af samningnum en þeir eiga sjálfir í átökum við samtökin.

Bandaríkin hafi í þokkabót hætt drónaárásum á al-Kaída á meðan á viðræðunum stóð. Þessu neitaði talsmaður bandaríska varnarmálaráðuneytisins.

Blóðug átök

Rætur stríðsins í Jemen liggja í arabíska vorinu svokallaða, mótmælaöldu Arabaríkja gegn einræðisherrum. Jemenar mótmæltu forsetanum Ali Abdullah Saleh árið 2011 og náðu að knýja fram valdaskipti. Abdrabbuh Mansour Hadi tók við völdum.

Hadi gekk illa að taka við taumunum. Hútar, uppreisnarhreyfing sjíamúslima, gerðu uppreisn síðla árs 2014 gegn ríkisstjórninni. Uppreisnarmennirnir tóku stóran hluta landsins, meðal annars höfuðborgina Sana og eftir að hafa upphaflega flúið til hafnarborgarinnar Aden flúði Hadi land í mars 2015.

Sádi-Aröbum leist ekki á blikuna, fullvissir um að Íranar stæðu að baki uppreisninni, og í slagtogi við önnur ríki súnnímúslima á svæðinu hömruðu þeir saman hernaðarbandalag með það að markmiði að koma Hadi aftur til valda. Íranar hafa ítrekað neitað því að tengjast Hútum, þótt fjölmargir blaðamenn og rannsakendur hafi greint frá tengslunum. Líkt og í Sýrlandi, og raunar víða, má því flokka átökin í Jemen sem leppstríð Sádi-Araba og Írana.

Auk Sádi-Araba eru Bareinar, Kúveitar, Egyptar og fleiri í bandalaginu. Nýtur það jafnframt stuðnings Bandaríkjanna, Bretlands og Tyrkja.

Ekkert ríki hefur lýst yfir stuðningu við Húta. Íranar og Hezbollah-samtökin sjá þeim þó fyrir vopnum, samkvæmt fjölmörgum rannsóknum. Katarar eru einnig taldir hafa gengið til liðs við Húta árið 2017 eftir að kastaðist í kekki á milli þeirra og Sádi-Araba.

Hútar halda nú vesturströnd landsins, Hadi-stjórnin stærsta partinum þar fyrir utan, en aðskilnaðarsinnar halda svæðum á suðurströndinni og al-Kaída og ISIS hafa hreiðrað um sig um mitt landið.

Að minnsta kosti 10.000 hafa farist í stríðinu. Sú tala er að öllum líkindum miklu hærri.

Ástand mannúðarmála er hamfarakennt. Á sunnudag sagði Evrópusambandið það hvergi verra.

Uppfært 12:30: Í upphaflegri útgáfu fréttarinnar kom fram að Atlantshafsbandalagið styddi hernaðarbandalagið. Það er ekki rétt og biðst Fréttablaðið velvirðingar á rangfærslunni.

Athugasemdir

Auglýsing
Auglýsing

Tengdar fréttir

Jemen

Hútar sagðir pynta fanga sína

Jemen

Uppfylla skilyrði friðarviðræðna við Húta

Jemen

Nærri hundrað þúsund börn hafa farist

Auglýsing

Nýjast

Jón Gnarr og Frosti deila um opin­bera smánun

Hvetja foreldra til að sækja börn í frístund

Mikil­vægt að ganga vel frá lausum munum

May sögð ætla að fresta Brexit-at­kvæða­greiðslu

Fjöldamorðingi dæmdur fyrir 56 morð til viðbótar

Jemt­land í á­tján ára fangelsi fyrir morðið á eigin­konu sinni

Auglýsing