Donald Trump Bandaríkjaforseti segir á Twitter í dag að flugvélar séu orðnar allt of flóknar. Ekki sé lengur nauðsynlegt að manna þær flugmönnum heldur þurfi tölvunarfræðinga til að stýra þeim.

Flugfélög hafa í dag keppst við að taka Boeing 737 Max 8 vélar úr umferð eftir tvö mannskæð flugslys að undanförnu.

Trump segist margoft hafa séð þessa þróun, með ýmsar vörur. „Menn leitast alltaf við að stíga einu skrefi of langt, þegar gamalt og einfalt er miklu betra,“ skrifar hann um tækniframfarir í flugi.

Forsetinn segir að stundum þurfi að taka ákvarðanir á sekúndubroti. Flókinn búnaður torveldi slíkar ákvarðanir og skapi fyrir vikið hættu. Sparnaðurinn sé lítill. „Ég veit ekki með ykkur, en ég vil ekki að Albert Einstein sé flugmaðurinn minn. Ég vil flugmenn sem eru fagmenn og geti tekið við stjórn vélanna hratt og örugglega.“