Donald Trump, fyrrum for­seti Banda­ríkjanna var með skjöl á heimili sínu Mar-a-Lago í Flórída sem varða ástar­líf for­seta Frakk­lands, Emmanuel Macron.

Þann 8. ágúst fram­kvæmdi banda­ríska al­­ríkis­lög­reglan, FBI, hús­­leit á heimili Trumps. Hús­­leitin fór fram á heimili for­setans fyrr­verandi í Mar-a-Lago á Palm Beach, en hús­leitin tengdist opin­berum skjölum úr for­­seta­­tíð Trumps sem hann hafði tekið heim til sín úr Hvíta húsinu í leyfis­­leysi.

Meðal skjala sem fundust við hús­leitina voru upp­lýsingar um kyn­líf Emmanuel Macron, for­seta Frakk­lands. Skjölin voru merkt „Item 1a,“ sem var skráð sem „upp­lýsingar um: for­seta Frakk­lands“, sam­kvæmt the Rolling Stone.

Ekki er vitað ná­kvæm­lega hvaða upp­lýsingar skjölin hafa að geyma, en Trump hefur lengi verið heillaður af einka­lífi Macron. Í grein Rolling Stone segir einnig að Trump hafi haldið því fram að hann hafi fengið upp­lýsingar um einka­líf Macron frá „leyni­þjónustu“ á hans snærum.

Einn af heimildar­mönnum Rolling Stone heldur því fram að Trump hafi ekki deilt þeim upp­lýsingum sem hann hefur varðandi ástar­líf Macron, en hann hefur montað sig af þeim.

Einka­líf Emmanuel Macron hefur verið um­talað síðan hann var kjörinn for­seti árið 2017. Hann er giftur Brigitte Macron, sem er 25 árum eldri en hann og fyrrum kennari hans úr fram­halds­skóla.

Forsetahjónin.
Fréttablaðið/Getty