Læknirinn Tómas Guðbjartsson, stjórnarmeðlimur í Ferðafélagi Íslands, hefur sent frá sér perónulega yfirlýsingu vegna afsagnar Önnu Dóru Sæþórsdóttur, forseta félagsins, sem sakaði í dag stjórn félagsins um að þagga niður mál er varða áreitni og kynferðisofbeldi. Hann vill meina að Anna hafi ekki farið með rétt mál í yfirlýsingu sinni.

Á síðasta ári sagði Helgi Jóhannesson, fyrrverandi yfirlögfræðingur Landsvirkjunar, sig úr stjórn félagsins í kjölfar ásakanna. Anna hélt því fram að einstaklingur í stjórn Ferðafélagsins hafi reynt að fá hann aftur í stjórn á þessu ári. Í frétt Vísis um málið var því haldið fram að umræddur stjórnarmeðlimur væri Tómas. Hann segist aldrei hafa krafist þess.

„Ég hef aldrei lagt til að fyrrum stjórnarmaður tæki aftur sæti í stjórn félagsins, eða krafist þess að hann komi aftur til starfa fyrir félagið. Hann hefur heldur ekki krafist þess og var nýr stjórnarmaður kosinn í hans stað á síðasta aðalfundi félagsins.“ segir í færslu Tómasar á Facebook.

Hann útskýrir mál sitt á þann veg að hann hafi óskað eftir því að mál Helga myndi fá formlega umfjöllun stjórnar. Hann segir Önnu ekki hafa litist vel á það. „Sami aðili hafði hins vegar sent stjórn félagsins erindi sl. vor þar sem hann óskaði eftir að fá að útskýra sína hlið á skyndilegu brotthvarfi úr stjórn í nóvember 2021. Taldi ég á stjórnarfundi rétt að erindið fengi formlega umfjöllun stjórnar, sem forseti taldi ekki ástæðu til, en mér falið að koma á óformlegum fundi sem forseti hugðist ekki sækja.“ skrifar Tómas.

Í lok færslu sinnar segir Tómas að um sé að ræða sorglegt mál og vill hann meina að Anna hafi snúið staðreyndum á hvolf með yfirlýsingu sinni í morgun. „Viðskilnaður forseta við stjórn og framkvæmdastjóra Ferðafélags Íslands er sorglegt mál, ekki síst fyrir Ferðafélag Íslands, þar sem staðreyndum er snúið á hvolf og umræðan færð frá þeim alvarlega samskiptavanda sem litað hefur starf stjórnar sl. ár.“