Samkvæmt nýjustu tölum Hagstofunnar fjölgaði Íslendingum um 2.470 á þriðja ársfjórðungi 2019. Alls bjuggu 362.860 einstaklingar á landinu í lok september, 186.220 karlar og 176.640 konur. Á höfuðborgar svæðinu búa nú 232.070 en 130.790 utan þess.

Alls fæddust 1.250 börn á ársfjórðungnum en 540 Íslendingar yfirgáfu þessa jarðvist. Á sama tíma fluttust 1.560 til landsins umfram brottflutta. Brottfluttir einstaklingar með íslenskt ríkisfang voru 210 umfram aðflutta, en aðfluttir erlendir ríkisborgarar voru 1.770 fleiri en þeir sem fluttust frá landinu.

Danmörk var helsti áfangastaður brottfluttra íslenskra ríkisborgara en þangað fluttust 500 manns á þriðja ársfjórðungi. Til Danmerkur, Noregs og Svíþjóðar fluttu 880 íslenskir ríkisborgarar af samtals 1.150. Af þeim 1.280 erlendu ríkisborgurum sem fluttu frá landinu fóru flestir til Póllands, eða 370.

Flestir aðfluttir íslenskir ríkisborgarar komu frá Danmörku eða 310, 140 frá Noregi og 210 frá Svíþjóð, samtals 670 af 950. Pólland var upprunaland flestra erlendra ríkisborgara, en þaðan fluttust 790 til landsins af alls 3.050 erlendum innflytjendum. Litháen kom næst, en þaðan fluttu 250 erlendir ríkisborgarar til landsins. Í lok annars ársfjórðungs bjuggu 48.640 erlendir ríkisborgarar á Íslandi, eða 13,4% af heildarmannfjölda.