Neyðarkall frá áhöfn fiskiskips úti fyrir Norðurlandi barst stjórnstöð Landahelgisgæslunnar á öðrum tímanum í dag vegna elds um borð skipsins en þyrlusveit Landhelgisgæslunnar var kölluð út vegna málsins.

Að því er kemur fram í tilkynningu frá Landhelgisgæslunni voru sjóbjörgunarsveitir á vegum Slysavarnafélagsins Landsbjargar á Norðurlandi kallaðar út en þær sjá um að flytja slökkviliðsmenn að skipinu.

Fjórir voru í áhöfn skipsins en þeir náðu fljótt að ráða niðurlögum eldsins og er yfirvofandi hætta liðin hjá. Slökkvikerfi skipsins var virkjað og lokað niður í vélarrúm. Bátar í grenndinni voru beðnir um að halda á staðinn og eru nú tveir fiskibátar komnir að skipinu.

Þyrla Landhelgisgæslunnar fór á loft frá Reykjavík klukkan 13:40 en var endurkölluð í ljósi þess að hætta væri liðin hjá. Gert er ráð fyrir að skipið, sem er nú vélarvana, verði dregið til hafnar af öðru fiskiskipi, Björgu, sem var á siglingu skammt frá.