„Líf mitt er í rúst eftir að dóttir mín var myrt,“ segir móðir Lou­isu Vestera­ger Jesper­sen, danskrar konu sem var myrt með hrotta­fengnum hætti í Marokkó á síðasta ári, í tilfinningaríku bréfi sem lesið var í réttarsal í Marokkó í dag.

Alls eru 24 víga­menn á­kærðir fyrir morðin á Jesper­sen, sem var 24 ára þegar hún lést, og hinni norsku Maren Ueland, 28 ára, en þær voru á ferðalagi Atlasfjöllunum í Marokkó þegar mennirnir urðu á vegi þeirra.

Aðalmeðferð í málinu var fram haldið í dag en dómur kemur næst saman 18. júlí þegar málflutningur fer fram. Þá mun sömuleiðis koma í ljós hvenær dómur verður kveðinn upp í málinu.

„Ég tárast þegar ég hugsa um hana,“ sagði móðir Jesper­sen í bréfi sem starfsmaður réttarins las upp í dag. „Ég veit fyrir víst að hún kallaði á mig þegar hún var myrt.“

Sjá einnig
Játar að hafa af­höfðað aðra kvennanna í Marokkó

Einn af víga­mönnunum játaði við aðalmeðferðina, sem hófst í maí, að hafa af­höfðað aðra stúlknanna. Hinn 25 ára Abdes­samad Ejjoud sagði fyrir dómi að mennirnir hafi verið innblásnir af voðaverkum Íslamska ríkisins.

You­nes Ou­azi­yad, 27 ára, og Rachid Afatti, 33 ára, eru ásamt áðurnefndum Ejjoud taldir hafa fyrir­skipað morðin og tekið þátt í þeim. Þeir gætu þeir átt yfir höfði sér dauða­refsingu verði þeir fundnir sekir.

„Þeir eiga ekkert annað skilið en dauða­refsingu,“ sagði í bréfi móðurinnar að er norska ríkis­sjón­varpið, NRK, greinir frá. „Heimurinn væri betri staður án þeirra.“