Aðalstjórn íþróttafélagsins KA á Akureyri þykir miður að ákæruvaldið hafi farið þá leið að ákæra tvo sjálfboðaliða á vegum handknattleiksdeildar KA og KA/Þór.
Þetta kemur fram í yfirlýsingu sem birtist á heimasíðu KA í morgun, en RÚV greindi frá því á föstudag að fimm hefðu verið ákærðir vegna hópslyss sumarið 2021 þegar hoppukastali tókst á loft á Akureyri.
Einstaklingarnir eru ákærðir fyrir líkamsmeiðingar af gáleysi, en alls slösuðust tíu börn í sæysinu, þar á meðal ung stúlka sem hlaut alvarlega áverka.
„KA harmar það slys sem varð sumarið 2021 þegar hoppukastali tókst á loft með þeim hörmulegu afleiðingum sem af því hlaust. Hugur okkar í KA hefur fyrst og fremst verið hjá þeim sem fyrir þessu skelfilega slysi urðu. Svo verður áfram,“ segir í yfirlýsingu frá aðalstjórn KA.
Í yfirlýsingunni er bent á að Handknattleiksdeild KA hafi tekið að sér í fjáröflunarskyni að útvega starfsmenn sem sinna skyldu miðasölu og umsjón á svæðinu fyrir eiganda og ábyrgðaraðila leiktækisins. Var það gert í góðum hug allra viðkomandi, að því er segir í yfirlýsingunni.
„Nú hefur komið fram að tveimur sjálfboðaliðum á vegum Handknattleiksdeildar KA og KA/Þór hafa verið birtar ákærur vegna þessa máls. Frjáls félagasamtök líkt og KA vissulega er, byggja tilvist sína á miklu og fórnfúsu starfi sjálfboðaliða. Okkur þykir miður að ákæruvaldið hafi ákveðið að fara þessa leið í ljósi þess að eigandi og ábyrgðaraðili hoppukastalans hefur ítrekað lýst ábyrgð sinni á slysinu í fjölmiðlum. En um leið sýnum við því skilning að málið þarf að reka áfram í þeim farvegi sem það er nú í þar til niðurstaða fæst.“
