Matvælastofnun óskar eftir sýnum úr sauðfé frá bændum í Tröllaskagahólfi vegna gruns um að að riða hafi greinst í sauðfé sem flutt var frá Stóru-Ökrum þar sem riðuveiki var staðfest í gær.

Féð var flutt að Grænumýri og Syðri-Hofdölum í Blönduhlíð, og að Hofi í Hjaltadal og kannar MAST hvaða flutningar hafa átt sér stað frá þessum þremur bæjum.

Staðan er alvarleg og þurfa bændurnir líklega að lóga allt að þrjú þúsund fjár greinist riða á öllum fjórum bæjum. Engin lækning er til við veikinni og þarf því að fella og farga öllum dýrum.

Staðfestingu á endanlegri greiningu er að vænta um miðja næstu viku frá Tilraunastöð Háskóla Íslands að Keldum en beðið er niðurstaðna úr fleiri sýnum til að kortleggja útbreiðslu smits innan hólfsins.

MAST tekur fram að engar vísbendingar eru um að fólki stafi hætta af snertingu við riðusmitað fé né neyslu afurða þess, svo sem kjöts, innmatar og mjólkur. Hvorki neytendur né fólk sem starfar á sauðfjárbúum eða í sláturhúsum er í hættu vegna riðuveiki í sauðfé.