Þrjú innanlandssmit greindust í gær og eru 114 nú í einangrun með virkt smit hér á landi. Öll tilfellin voru greind á sýkla- og veirufræðideild Landspítalans.

Eitt jákvætt sýni greindist við landamæraskimun en beðið er niðurstöðu úr mótefnamælingu.

962 eru í sóttkví og fjölgaði um 16 frá deginum áður. Enn er einn innlagður á gjörgæslu Landspítalans með COVID-19.

394 sýni voru rannsökuð á sýkla- og veirufræðideild Landspítalans í gær. 2.203 sýni voru tekin og greind við landamæraskimun.

Virk smit finnast nú í öllum landshlutum, langflest á höfuðborgarsvæðinu, eða 82 talsins.

Almannavarnadeild ríkislögreglustjóra og embætti landlæknis boða til upplýsingafundar 14:00 í dag.

Þar munu Víðir Reynisson, yfirlögregluþjónn og Alma Möller, landlæknir fara yfir stöðu mála varðandi framgang COVID-19 faraldursins hér á landi. Gestur fundarins verður að þessu sinni Ásgeir Þór Ásgeirsson, yfirlögregluþjónn hjá Lögreglunni á höfuðborgarsvæðinu.