Auðunn Lúthersson, betur þekktur sem Auður, sendi frá sér yfirlýsingu í gær þar sem hann baðst afsökunar og kvaðst hafa gengið yfir mörk. Tónlistarmaðurinn þvertók þó fyrir flökkusögur um alvarleg afbrot.
Borið hefur hátt á umræðum um meint brot Auðuns á samfélagsmiðlum síðastliðna daga og hafa ásakanirnar orðið til þess að Auður mun ekki koma fram á tónleikum Bubba í komandi viku eða á sviði Þjóðleikhússins í uppsetningu Rómeó og Júlíu næsta haust.
Blaut tuska í andlitið
Afsökunarbeiðni Auðuns varð síðan til þess að þrjár konur hafa stigið fram og lýst kynferðislegu ofbeldi af hálfu Auðuns.
„Þessi afsökunarbeiðni er eins og blaut tuska í andlitið,“ sagði ein kvennanna á Twitter og greindi frá því að Auðunn hefði fengið hana til að gera eitthvað sem hún vildi alls ekki. „Ég, ung og vissi ekkert og hann vinsæll og frægur.“
Í yfirlýsingu sinni vísaði Auðunn sérstaklega til tveggja ára brots. „Árið 2019 fór ég yfir mörk konu án þess að átta mig á því fyrr en við töluðum saman síðar,“ sagði Auðunn, sem kvaðst hafa beðist afsökunar og reynt að axla ábyrgð.
Baðst afsökunar á brotinu
Önnur kona gagnrýndi að tónlistarmaðurinn tæki einungis opinberlega ábyrgð á broti gegn konunni sem hafði sakað hann um ofbeldi opinberlega en ekki gagnvart öðrum sem hann vissi þó af.
„Hann vissi að hann braut á mér þar sem ég talaði við hann um það nokkrum dögum eftir atburðinn en ég ákvað að fyrirgefa honum. Hann hringdi í mig fyrir nokkrum vikum og sagðist taka fulla ábyrgð á því sem hann hefur gert en þessi opinbera afsökunarbeiðni var eins og blaut tuska í andlitið og algjör u-beygja.“
Þriðja konan sagði tónlistarmanninn síðan hafa áreitt sig ítrekað og látið henni líða illa. Hún birti síðar skjáskot þar sem hún sagði Auðunn hafa séð umrædda færslu og hafa í kjölfarið hætt að fylgja henni á samfélagsmiðlum.
