Héraðs­dómur Reykja­víkur úr­skurðaði þrjá í á­fram­haldandi gæslu­varð­hald í dag vegna morðsins í Rauða­gerði. Lög­reglan á höfuð­borgar­svæðinu stað­festir þetta.

Tveir voru úr­skurðaðir í á­fram­haldandi tveggja vikna gæslu­varð­hald til mið­viku­dagsins 17. mars og einn var úr­skurðaður í á­fram­haldandi viku­langt gæslu­varð­hald til mið­viku­dagsins 10. mars.

Gæslu­varð­hald yfir einum rann út í dag og var sá úr­skurðaður í fjögurra vikna far­bann til mið­viku­dagsins 31. mars.

Fjórir eru nú í gæslu­varð­haldi vegna málsins, fimm hafa verið úr­skurðaðir í far­bann og alls tólf eru með réttar­stöðu sak­bornings.

Fréttablaðið greindi frá því í gær að hluti þeirra einstaklinga sem eru með réttarstöðu sakbornings hafa áður komið við sögu lögreglu í heimalöndum sínum.

Rannsókn morðsins er umfangsmikil og teygir anga sín út fyrir landsteinana en Lögreglan á höfuðborgarsvæðinu vinnur með löggæslu frá heimalöndum hinna grunuðu við að rekja mögulegan sakaferil þeirra.

Armando Beqirai var myrtur í Rauða­gerði þann 13. febrúar síðast­liðinn. Hann var frá Albaníu en bú­settur á Ís­landi og lætur eftir sig ís­lenska eigin­konu og eitt barn. Armando starfaði við öryggis­gæslu og kom að rekstri fyrir­tækisins Top Guard sem annaðist meðal annars dyra­vörslu á skemmti­stöðum í Reykja­vík.