Í nýju frumvarpi innviðaráðherra um breytingar á umferðarlögum er mælt fyrir um að heimilt sé að aka smáfarartæki á vegi þegar leyfilegur hámarkshraði er ekki meiri en 30 km á klukkustund en veghaldara sé þó heimilt að leggja bann við umferð þeirra á einstökum vegum eða vegarköflum.
Þá er einnig í frumvarpinu lagt til að börnum yngri en 13 ára verði bannað að aka smáfarartækjum og kveðið er á um hjálmaskyldu barna yngri en 16 ára við akstur slíkra farartækja.
Þá eru þar einnig settar reglur um að eiga við rafmagnsreiðhjól, smáfarartæki eða létt bifhjól þannig að hámarkshraði þeirra verði umfram 25 kílómetrar á klukkustund, það sama á við létt bifhjól í flokki II að undanskildu því að hámarkshraði þeirra má vera 45 km á klst.
Sigurður Ingi Jóhannsson, innviðaráðherra, sagði frá áformunum á Umferðarþingi 2022 í gærmorgun en eitt meginviðfangsefni þingsins var öryggi óvarinna vegfarenda í umferðinni:
„Með því að ferðast stuttar vegalengdir gangandi, hjólandi eða með strætó drögum við úr losun gróðurhúsalofttegunda, stuðlum að betri loftgæðum í þéttbýli og vinnum að bættri lýðheilsu. Það stafa þó ýmsar hættur að óvörðum vegfarendum. Því er nauðsynlegt að gera breytingar á regluverki umferðar til að auka öryggi þeirra sem nýta þennan fararmáta, m.a. á smáfarartækjum,“ sagði ráðherra á þinginu.
17 prósent slasaðra á rafhlaupahjóli
Drög að frumvarpinu hafa verið birt í samráðsgátt en í tilkynningu ráðuneytis segir að þar sé að finna ýmis ný ákvæði sem hafa það markmið að auka öryggi vegfarenda á smáfarartækjum í umferðinni en nýta jafnframt kosti þeirra. Breytingarnar byggja á tillögum starfshóps um smáfarartæki sem skilaði skýrslu í júní á þessu ári.
Í kynningu um frumvarpið í samráðsgátt segir að umferð smáfarartækja, sérstaklega rafhlaupahjóla, hafi aukist og slysum hafi fjölgað mikið á síðustu árum. Breytingar á umferðarvenjum hafa leitt til þess að 17 prósent þeirra sem slösuðust alvarlega í umferðinni á síðastliðnu ári voru á rafhlaupahjólum, en umferð þeirra er þó innan við eitt prósent af allri umferð.
42 prósent alvarlega slasaðra í umferðinni á síðasta ári voru gangandi, hjólandi eða á rafhlaupahjóli og stór hluti fyrrgreindra slysa átti sér stað seint á föstudögum eða laugardögum.
Þá kemur einnig fram að í hópi óvarinna vegfarenda sem slösuðust alvarlega í umferðinni á síðastliðnu ári voru ungmenni áberandi og komu mörg ung börn, allt niður í átta ára gömul á neyðarmóttöku Landsspítalans vegna slysa á rafhlaupahjólum.
Framleiðendur mæla almennt fyrir um 14 til 16 ára aldurstakmark til notkunar rafhlaupahjóla sinna en ung börn má sjá á rafhlaupahjólum ætluðum eldri notendum.
