Þorsteinn Víglundsson, þingmaður Viðreisnar, lýsti eftir ríkisstjórninni í störfum þingsins við upphaf þingfundar í dag. „Ég vildi nú gjarnan nýta þessar tvær mínútur til að lýsa eftir ríkisstjórninni og kannski spyrja hæstvirtan forseta hvort ríkisstjórnin hafi nokkuð lagt niður störf eða farið í langt vetrarfrí og gleymt að láta þingið vita af því,“ sagði Þorsteinn í ræðu sinni.

Of sein með 90% mála

Hann rifjaði svo upp gagnrýni á ríkisstjórnina fyrir áramót vegna þess hve seint mál komu fram frá stjórninni og hve fá mál hún hefði lagt fram fyrir áramót. Ríkisstjórnin hafi endurskoðað þingmálaskrá sína í janúar með áformum um að leggja fram alls 48 mál í janúar og febrúar. Aðeins fimm mál eru þó komin frá stjórninni samkvæmt talningu Þorsteins, eða rúm 10 prósent.

„Er ríkisstjórnin hætt störfum?“

Í ræðu sinni gagnrýndi hann líka að ásamt hægagangi í framlagningu mála nái ríkisstjórnin heldur ekki að svara þeim fyrirspurnum sem til hennar er beint, á tilsettum tíma og tók dæmi um tveggja mánaða gamla fyrirspurn sína um fjölda nefnda og ráða sem ríkisstjórnin hafi sett á fót á kjörtímabilinu.

„Þess vegna held ég að það sé tilefni til að spyrja það: Er þessi ríkisstjórn hætt störfum eða eigum við að bíða? Hún er greinilega ekki í vinnunni því að alla vega bólar ekkert á þeim málum sem hún boðaði að kæmi fyrir þingið og enn eina ferðina virðist ætla að verða raunin að við fáum þessi mál seint.“

Þingmannamál haldi þingstörfum uppi

Þótt Þorsteinn fagni því að stjórnin leggi fram færri mál lýsti hann í ræðu sinni áhyggjum af því að mál ríkisstjórnarinnar komi of seint og þá líklega beint ofan í umræðu um fjármálaáætlun sem sé handan við hornið.

„Og á sama tíma og ekki bólar á neinum málum frá ríkisstjórninni erum við að fjölga nefndadögum og ég spyr: Til hvers? Því að varla er það ætlun meiri hluta þings að hleypa í gegn öllum þeim þingmannamálum sem hafa haldið uppi þingstörfunum hér í allan vetur,“ spurði Þorsteinn og tók fram að hann myndi taka slíkri tilbreytingu með mikilli gleði, þótt hann hefði ekki trú á slíkum áformum.