Þórólfur Guðnason sóttvarnarlæknir segir bólusetningar hér á landi ekki vera lyfjatilraun í svari sínu til Arnþrúðar Karlsdóttur, útvarpsstjóra Útvarps Sögu, af á upplýsingafundi Almannavarna nú í morgun.

Arnþrúður spurði Þórólf út í bólusetningar. „Í samningnum um bóluefnin kemur fram að um lyfjatilraun sé að ræða sem verði ekki lokið fyrr en árið 2024. Heilbrigðisráðherra, Willum Þór, sagði á fundi velferðarnefndar um daginn að þessu yrði ekki lokið fyrr en 2026. Af hverju hafið þið ekki valið að fara þá leið að segja þjóðinni frá því að hún væri að taka þátt í lyfjatilraun?,“ spurði hún.

Þórólfur svaraði að hann vissi ekki hvað hún væri að vísa til. „Það er Lyfjastofnun sem gefur markaðsleyfi fyrir notkun lyfjanna að undangengnum rannsóknum og tilraunum,“ sagði Þórólfur.

„Ég er ekki aðili að þessum samningi og ég get ekki sannreynt það sem þú ert að halda fram að hér að þar standi að hér sé um lyfjatilraun að ræða. Ég vil draga það í efa. Þetta er ekki lyfjatilraun. Við erum að nota hér lyf sem hefur verið rannsakað til að koma í veg fyrir ákveðinn sjúkdóm, hættulegan sjúkdóm. Hér er um heimsfaraldur að ræða og ég tel að það sé búið að uppfylla allar kröfur til lyfja og bóluefna sem við getum gert í slíku ástandi.“

Arnþrúður spurði á móti: „En er það þá rangt hjá heilbrigðisráðherra að þessu ljúki ekki fyrr en 2026, sem hann fullyrti við velferðarnefnd Alþingis?“

„Ég ætla ekkert að fara að ræða um eitthvað sem þú fullyrðir að einhver hafi sagt. Ég hef ekki heyrt það og ég veit það ekki. Þú verður að spyrja hann sjálfan.“

Willum svaraði spurningu Guðmundar Inga

Vísaði hún þar í svar Willum Þór Þórssonar, heilbrigðisráðherra, á fundi velferðarnefndar 29. desember síðastliðinn. Þar svaraði hann spurningu Guðmundar Inga Kristinssonar, þingmanns flokks fólksins, um rannsóknir á bóluefni Pfizer á börn. „Ef ég man rétt í þessari skýrslu þá kemur fram að það er ekki hægt að búast við neinum staðfestum rannsóknum fyrr en 2026. Það kann að vera að ég sé að fara eftir minni, þá leiðréttir mig einhver,“ sagði Willum í svari sínu á fundinum. Hér má horfa á fundinn í heild sinni, umræðan á sér stað 01:42 mínútu.

Víðir stöðvaði Arnþrúði af

Arnþrúður ætlaði að halda áfram: „Vísindasiðanefnd…“

Greip þá Víðir fram í fyrir henni: „Arnþrúður. Við höfum ekki tíma. Eins og fram kom fyrir fundinn var bara ein spurning á mann. Takk fyrir þína spurningu Arnþrúður.“