Þórólfur Guðnason, sóttvarnarlæknir, stendur við heildarniðurstöðu pistils síns á vefsíðu Covid.is frá 13. desember þar sem hann segir Covid-19 geta verið alvarlegan sjúkdóm hjá börnum sem réttlætir bólusetningu.

Þetta kemur fram í nýjum pistli á vef Covid.is.

Þórólfur skrifar pistilinn vegna athugasemda við fyrri pistli sínum á alvarlegum afleiðingum Covid-19 hjá börnum og virkni bólusetninga.

Hann segir athugasemdir sem snúi að skilgreiningu á smiti og sýkingu með einkennum vera réttar og þakkar hann fyrir ábendingarnar.

„Í pistlinum var talað um að spítalainnlagnir hjá börnum á aldrinum 5-11 ára af völdum COVID-19 væru um 0,6% af öllum smitum og var vitnað í samantekt Sóttvarnastofnunar Evrópusambandsins.

Eins og réttilega kemur fram í athugasemdunum þá var hlutfall spítalainnlagna 0,6% hjá þeim börnum sem voru með einkenni af völdum COVID-19 en einkennin voru ekki skilgreind nánar. Það er því rökrétt að álykta sem svo að hlutfallið sé sennilega lægra þegar miðað er við öll smit með eða án einkenna,“ segir Þórólfur meðal annars í pistli sínum.

Ekki þekkt hlutfall á Íslandi

Að sögn Þórólfs eru sjúkdómstilfelli ekki aðgreind eftir einkennum þegar upplýsingar frá Bandaríkjunum eru skoðaðar og vitnað var í, í fyrrgreindum pistli.

„Líklegt má því telja að fjöldi tilfellanna samanstandi bæði af börnum með einkenni og börnum án einkenna. Hlutfall spítalainnlagna í Bandaríkjunum er hins vegar svipað og greint er frá í uppgjöri Sóttvarnastofnunar Evrópu.“

Þórólfur segir hlutfallt einkennalausra barna af öllum börnum sem greinast ekki vera þekkt og að erlendum rannsóknum beri ekki saman.

Ef áætlað sé að meðaltal úr bandarískum rannsóknum sé nær raunveruleikanum, megi álykta að einkenni sjáist hjá um 70 prósent barna sem smitist af Covid-19.

Leiðrétting frá fyrri pistli

„Ef öll 32.000 börn hér á landi á aldrinum 5-11 ára smitast af COVID-19 þá gæti útkoman orðið eftirfarandi: innlagnir gætu orðið 134 (í stað 100-200 sem getið var um í pistlinum), 13 lagst inn á gjörgæsludeild (í stað 16 sem getið var um í pistlinum) og um eitt barn látist (í stað 1-2 sem getið var um í pistlinum),“ segir Þórólfur í pistlinum.

Þórólfur segir að athugasemdir hafi einnig borist um virkni bólusetningar hjá börnum á aldrinum 5 til 11 ára, en sagt var að hún væri 90 prósent gegn smiti.

Að sögn Þórólfs er virknin 90 prósent gegn smiti hjá börnum með einkenni, ávinningur af bólusetningunni sé eftir sem áður ótvíræður.