Þórólfur Guðnason sóttvarnalæknir hafði samband við lyfjaframleiðandann Pfizer þann 15.desember síðastliðinn og viðraði þá hugmynd hvort Ísland gæti orðið sérstakt rannsóknarsetur fyrir áframhaldandi virkni og verkun bóluefnis fyrirtækisins, þar sem stærstur hluti þjóðarinnar yrði bólusettur á stuttum tíma. Þetta kemur fram í tilkynningu frá sóttvarnalækni.

"Það er því ekki rétt sem haft er eftir Kára Stefánssyni meðal annars í Morgunblaðinu í dag að hugmyndin að þessu rannsóknarfyrirkomulagi hefði komið frá forstjóra fyrirtækisins. Kári Stefánsson hefur á hinn bóginn verið ötull með samskiptum sínum við forsvarsmenn Pfizer við að ljá málinu brautargengi," er haft eftir Þórólfi.

"Á þessari stundu er hins vegar óljóst hvort af þessari rannsókn verður. Beðið er svara Pfizer," segir jafnframt í tilkynningunni.