Þórólfur Guðnason, sóttvarnalæknir, segir að hann hafi ekki enn gert nýjar tillögur um hertar takmarkanir. Hann segist enn bíða eftir því að Landspítalinn láti vita að þau ráði ekki við aðstæður vegna mikils fjölda smita í þessari bylgju faraldursins. Tæpur mánuður er frá því að smitum fór að fara fjölgandi.
„Þetta er sami línulegi vöxturinn. Það er breytilegt á milli daga en við erum í þessu sama fari,“ segir Þórólfur en minnst 130 smit voru greind í gær af þeim nærri fjögur þúsund sýnum sem voru tekin.
Alls eru nú 32 inniliggjandi með smit á Landspítalanum og af þeim eru átta á gjörgæslu og fimm í öndunarvél.
„Þetta er að fara uppávið. Það voru tveir útskrifaðir í gær en sex lagðir inn þannig að róðurinn er greinilega að þyngjast á spítalanum,“ segir Þórólfur.
Erum við komin á þann stað að þú leggir til hertar takmarkanir?
„Ég bíð eftir spítalanum. Það er enginn nema þau sem getur sagt til um það hvernig staðan er þar nema þau. Það eru margir að tjá sig um það en maður hlustar ekki á það, heldur á þau sem að þar vinna og stýra spítalanum. Ég bíð bara eftir því,“ segir Þórólfur.
Hann segir að þau sem hafi þurft að leggjast inn séu nokkuð alvarlega veik. 2,5 prósent þeirra sem hafa smitast hafa þurft á spítalainnlögn að halda og það hlutfall fer hækkandi að sögn Þórólfs.
„Þetta er alvarleg staða finnst mér,“ segir Þórólfur.
Nauðsynlegt að ná óbólusettum í bólusetningu
Spurður hvort að hann telji að við eigum eftir að sjá breytingar þegar búið er að gefa fólki örvunarskammt og hann orðinn virkur segir Þórólfur að það megi ekki gleyma því að um 60 prósent þeirra sem smitast eru bólusett og um 30 prósent óbólusett.
„Það þarf vissulega að ná þeim sem ekki eru bólusett í bólusetningu. Hún er að koma í veg fyrir smit og enn betri til að koma í veg fyrir alvarleg veikindi. Það er til mikils að vinna að fara bólusetningu og þess vegna hvetjum við alla sem enn eru óbólusett að fara í hana,“ segir Þórólfur.
Flest þeirra sem smitast og eru bólusett eru bólusett með bóluefni Janssen sem hefur verið talað um að hafi verri vörn. Þórólfur segir að þau sem smitast eigi það einnig sameiginlega að vera ungt fólk og stór hluti þeirra hafi fengið Janssen bóluefnið en í næstu viku hefst aukabólusetning þeirra sem fengu það bóluefni.
Heldurðu að fólk sé pirrað yfir því að þurfa að fara aftur?
„Ég veit það ekki. Við erum búin að útskýra fyrir fólki að við ætlum að veita þeim enn betri vörn. Það eru líka margir að fá sína þriðju sprautu. Fólk með undirliggjandi sjúkdóma og eldra fólk. Við erum að reyna allt sem við getum til að bæta ónæmisástand einstaklinga,“ segir Þórólfur.
Mikilvægt að missa ekki von
Hann segir að verkefni dagsins í dag sé að ráða bug á þessari bylgju sem er yfirstandandi. Spurður hvort að hann sé að missa von þegar fjöldinn smita hefur verið svona mikill í nærri mánuð segir Þórólfur það áhyggjuefni en segir að það megi ekki missa vonina.
„Ég er ekkert að missa von. Við vitum hvað þarf að gera. En ég finn að það er þreyta í mjög mörgum og menn eru orðnir leiðir á þessu en það þýðir ekki. Veiran hlustar ekkert á það. Ef það er þreyta og uppgjöf hjá okkur fáum við meiri veikindi og vandamál þannig við verðum að berjast og beita þeim aðferðum sem við höfum til að koma í veg fyrir alvarlega veikindi og álag á heilbrigðiskerfið,“ segir Þórólfur.
Hann segir að þótt svo að það sé mikilvægt að gæta að persónulegum sóttvörnum þá hafi það sýnt sig í fyrri bylgjum að það sé ekki hægt að ná faraldri niður nema með mjög hörðum aðgerðum.
„Það dugar ekki að höfða bara til fólks um persónulegar sóttvarnir. Það hefur ekki dugað í fyrri bylgjum og það er ólíklegt að það dugi eitt og sér núna,“ segir Þórólfur.
Já, er ekki líklegt að kallið komi bráðum frá spítalanum?
„Jú, ég get allt eins búist við því,“ segir hann að lokum.
