Í Kveiks­þætti kvöldsins á RÚV var rætt við Þóri Sæ­munds­son sem sagt var upp störfum hjá Þjóð­leik­húsinu árið 2017 fyrir að hafa sent ó­lög­ráða stúlkum kyn­ferðis­legar myndir. Þórir var fast­ráðinn leikari hjá Þjóð­leik­húsinu á þeim tíma en sagt upp störfum eftir að upp komst um málið.

Í Kveik var velt upp hvort að ein­staklingar geti átt aftur­kvæmt í sam­fé­lagið eftir að hafa orðið upp­vísir að á­mælis­verðri hegðun á borð við kyn­ferðis­brot.

Hefur sótt um hundruði starfa

Þórir segir í sam­tali við Kveik að hann hafi sótt um hátt í 300 störf eftir brott­reksturinn frá Þjóð­leik­húsinu en ekki haft erindi sem erfiði. Hann segist ekki hafa vitað að stúlkurnar hafi verið ó­lög­ráða en viður­kennir þó dóm­greindar­brest.

Hálfu ári áður en að málið komst upp segir Þórir að hann hafi fengið skila­boð á Snapchat frá tveimur stelpum. Þær hafi átt í kyn­ferðis­legum sam­skiptum við hann og meðal annars sent honum nektar­myndir.

Þórir segir að þær hafi sagst vera 18 ára gamlar. Hann hafi bitið á agnið og sent nektar­mynd til baka af sjálfum sér. Þá kom svar frá stelpunum: „Náðum þér! Við höfum heyrt að þú sért svona maður“ og lalalala eitt­hvað,“ segir Þórir og heldur á­fram: „Mér náttúru­lega dauð­brá og var rosa­lega hræddur því málið er bara þess eðlis þegar börn eru í hlut.“

Þórir segist hafa svarað stelpunum til baka að þær hafi ekki náð sér heldur stofnað sjálfar til sam­skiptanna og logið til um aldur: „Þó mér hafi brugðið þarna þá hugsaði ég að þetta færi ekkert, þetta væri ekkert mál. En svo kom á daginn að þetta varð meira mál úr þessu,“ segir Þórir.

Fær hvergi vinnu

Hann kveðst hafa misst af stórum tæki­færum: „Ég fæ ekki að vinna á Ís­landi, hvorki í því sem ég er þraut­þjálfaður, menntaður og reyndur í, og bara frekar góður í ef ég má segja það líka, ég má ekki vinna við það. Og síðasta vinna sem ég fékk, ég gafst upp á leik­listinni í rauninni, því ég er búinn að missa af kvik­mynda­verk­efni og stóru sjón­varps­verk­efni er­lendis,“ segir Þórir.

Hann hafi því leitað annarra leiða til að afla tekna: „Frændi minn verður mér úti um at­vinnu þar sem ég fæ að keyra ör­yrkja og fatlaða um borgina í fjóra daga áður en ein­hver for­stjóri á sam­býli í borginni hringir í Strætó og kvartar yfir því að ég sé að keyra. Hann biður yfir­manninn um að Googla og það er gert og ég er bara rekinn sam­dægurs,“ segir Þórir.

Hann heldur á­fram: „Ég er ekki svona maður. Það að þurfa að sitja svona undir því aftur og aftur, ég var líka búinn að á­kveða að ætla ekki að fella tár í þessu við­tali, en þetta er staðan sem ég er í.“