Þórdís Kolbrún Reykfjörð Gylfadóttir, atvinnu- og nýsköpunarráðherra, gefur lítið fyrir mynd sem hefur verið í dreifingu á samfélagsmiðlum undanfarinn sólarhring af henni og Björgólfi Jóhannessyni, starfandi forstjóra Samherja, á Akureyrarflugvelli. Myndinni, sem birtist fyrst á DV.is, var dreift á Facebook af Jæja-hópnum undir yfirskriftinni „Samstaða flokksins með Samherja“. Þórdís segir í samtali við Fréttablaðið að myndin sé ekki óheppileg enda hafi aðeins verið um tilviljun að ræða; hún hafi fengið sér sæti við borð og hann sest við hlið sér. Hún segir málefni Samherja ekki hafa borið á góma.

„Við ræddum það að sjálfsögðu ekki,“ segir Þórdís Kolbrún.

Vinalegt spjall

„Ég var að bíða eftir fluginu mínu. Ég fékk mér sæti í flug­stöð og las tölvu­póstana mína. Ég veit ekki hvað annað er um það að að segja,“ segir Þór­dís. Hún segist vissu­lega þekkja Björg­ólf enda unnið með honum í Stjórn­stöð ferða­mála undan­farin þrjú ár en spjall þeirra hafi einungis verið á vina­legum nótum.

„Ég keypti mér sóda­vatn og settist við þetta borð á meðan ég var að bíða eftir mínu flugi. Við ræddum meðal annars jóla­frí og barna­börnin hans og börnin mín.“ Hún segir myndina ekki ó­heppi­lega, enda hafi þau ekki átt neinn fund og hún hafi ekki verið að stilla sér upp með honum.

Voru í sama flugi

Þór­dís var á leið heim eftir ferð ráð­herra ríkis­stjórnarinnar um Norður­land, þar sem þeir skoðuðu á­standið eftir ó­veðrið í seinustu viku og hittu ýmsa aðila. Að­spurð segist Þór­dís ekki vita hvert Björg­ólfur var ná­kvæm­lega að fara.

„Hann var alla­vega í sama flugi og ég. Ég veit ekki hvert hann var svo að fara.“

Þórdísi Gylfadóttur, ráðherra Sjálfstæðisflokksins, sást með Björgólfi Jóhannssyni nýjum forstjóra Samherja á...

Posted by Jæja on Sunday, December 15, 2019